افغانستانده جمهور رييسليك كمپاينلر شيوه لري اوزگرتيريلماقده

افغانستان ده جمهور رييسليك نامزدلري نينگ سيلاو آلدي كمپاينلري اوغلاغ تارتيش و شونگه اوخشه گن باشقه شيوه لر بيلن باشلنه ياتگني ايتيله دي.

شمالي سرپل ولايتي ده اشرف غني طرفدارلري اولاغ تارتيش اويينلريني يولگه قوييب، اونينگ فايده سيگه كمپاين قيليشگن.

شونينگ افغانستان شرقي قسميده گي كنر ولايتيده هم اشرف غني طرفدارلري كسلخانه گه باريب، يره لنگن ملي اردو عسكرلريگه قان ياردم قيليشگن.

بيرنيچه كون ايچيده جمهور رييسليك نامزدلريدن بير قطاري نينگ سيلاو آلدي كمپاينلري اوزگريب، اوغلاق اويينلري بيلن باشلنماقده.

سرپل ولايتيده اشرف غني احمدزي نينگ يوز لب طرفدارلري اولاغ تارتيش اويينلريني يولگه قوييب، شو اويين بيلن اونينگ فايده سيگه كمپاين قيليشماقده.

اويينده نامزدنينگ طرفدارلري آوازني كوچه يتيروچي واسطه لر آرقه لي اونينگ فايده سيگه كمپاين قيليشدي.

شمالده آدملر اوز نامزدلري منفعتيگه اولاغ اويينلري آرقه لي كمپاين قيلرايكن، مملكت شرقي قسميده گي كنر ولايتي ده ايسه، اشرف گه طرفدار بيرقطار ياشلر سيلاو آلدي كمپاين جريانيده ملي اردوسي عسكرلريگه قان ياردم قيليشدي.

كنر ولايتي مركزي شفاخانه داكترلري ، ياشلرنينگ بو تدبيريني آلقيشلب، سيزلرنينگ بو انسان پرورليك ياردملرينگيز، باشقه لرگه هم بير يخشي تورتكي ديه تاكيدلشدي.

كمپاين لر كوندن كونگه جانلنيب، شيوه لري اوزگررايكن، اجتماعي ترماغلرده هم تومنلر و قيشلاقلرده كيته ياتگن كمپاينلر شيوه لري حقيده معلومات بيريلماقده. اينگ كوپ عموميلشگن فسسبوك صحيفه سيده فارياب نينگ انديخوي تومنيده هم جمهور رييسليك نامزدلريدن بيري نينگ طرفدارلري كونگيليك روشده پول ييغيشتيريب، كمبغل عايله لرگه آذيق آوقت ياردم قيليشگني عكس ايتديريلگن.

اما اوغلاغ اويينلري آرقه لي كمپاين، سرپل، ايمس، بلكه باشقه ولايتلرده هم يولگه قوييليشي ممكنليگي ايتيلماقده.

ليكن باشقه نامزدلرنينگ طرفدارلري ايسه، سيلاو آلدي كمپاينلريني كينگ ييغين و جانلي ترغبيات ايشلري بيلن آليب بارماقده لر.