هجوم آرتیدن ترکمنستان افغانستان بیلن چیگره سینی یاپدی

Image copyright AP

بو-ایلک بار ایککی دولت اورته سیده گی اوز ارا چیگره نینگ رسمن یاپیلیشی دیر.

افغانستان تمانیگه کوره بونگه شخصن ترکمنستان جمهور ریئسی قربانقولی بیردی محمد وف نینگ اوزی قرار قیلگن.

بی بی سی اوزبیک خذمتی اوز آرا چیگره دن صحبت لشگن افغانستان لیک یوقاری مرتبه لی مسئوللرگه کوره، ترکمن تمانی اوز قراری سببینی تولیق بیرشکلده ایضاحله مه گن.

اولرگه کوره، اوتگن پنجشنبه کونیدن بویان ترکمنستان نینگ افغانستان بیلن غربی جیگره لری یاپیقلیگیچه قالماقده.

اوتگن چهارشنبه دن پنجشنبه گه اوتر کیچه سی، ترکمنستان افغانستان نینگ غربی بادغیس ولایتیدن هجومگه توتیلگندی.

بیرگروه نامعلوم قوراللی شخصلر چیگره داش اوشبو ولایتدن ترکمنستان حدودیگه باستیرب کیلگن و اوز آرا آتشمه چاغیده اوچ ترکمن چیگره قوروقچی سی قربان بولگندی.

منطقه ده گی مخبرمیزگه کوره، افغانستان اوتگن اوتیز ییلدن بویان قوراللی نزاعلر ایچیده بولسه ده، بو- ترکمنستانگه قرشی اویشتیرلگن بیرینچی هجوم بولگن.

افغانستان اخبارات اداره سی هجومچی لر طالبان جنگریلری ایکنی حقیده خبر ترقه تیشگندی.

اما، یوز بیرگن واقعه دن بیر هفته اوته یاتگن بولسه- دهف افغانستان طالبان حرکتی هجومگه مسئولیتنی اوز ضمه سیگه آلیبب، بیرار بیر رسمی بیانات بیلن چیققنی یوق. اوز آرا چیگره ده یوز بیرگن هجوم تفصیلات لرینی اورگنگن افغانستان لیک خوف سیزلیک مساله لری بویچه تحلیلچی و منطقه ده گی بی بی سی مخبرلریگه کوره ، ترکمن چیگره چی لرینی هجومگه توتگن شخصلر مخدرماده قاچاقبرلری بولیشگن.

بو طالبلر یوق دیگنی ایمس

اگر، محلی کوزه توچی لرنینگ بیره یاتگن بها لریگه تینلسه، عینن بادغیس بوگون افغانستان نینگ طالبلر انچه فعال ولایتلریدن بیری سنله دی .

منطقه ده کی مخبر میز همایون حدید نینگ ایتیشیچه هم، بادغیش نینگ ترکمنستان بیلن چیگره داش شمالی ایککی- اوچ و حیرتان نینگ کوشکی کهنه تومنی حاضر بوتکل طالبلر نظارتی آستیده.

"بو تومنلرنینگ فقط مرکزیده حکومت بار، بار یاغی بیش چقریمگه چیقسینگیز، طالبلر حکمران لیک قیلیشه دی"، دیدی مخبر میز.

اونینگ، اوز اورنیده تاکیدله شیچه، ترکمنستان بیلن چیگره ده هم وضعیت خوددی شوندی" جیگره قوروقچی لری هم اوز پوسته لریدن اوزاققه باریشه آلمیدی.

"حتی ، اولرگه آزیق-اوقت، قورال-یراق و لازم اسکونه لرنی ایتکزیش اوچون افغانستان پلیس و قوراللی کوچلری فقط کاروان باغلب، باریشلری ممکن.و بو ایشگه اییلیککه یقین پلیس خادملری یا کی عسکرلر سفر بر ایتلیشه دی"، دیدی افغانستان غربیدن همکارمیز همایون حدید.

اما بی طرف موقعی باعث، افغانستان طالبان حرکتی شو پیتگچه بیرار بیر مرته ترکمنستان توپراغیگه کیریب بار مه گن .

مخبرمیزگه کوره، بو حدودلرده مخدر ماده لر قاچاقچیلری جوده فعال و او ییرده گی طالبلر بوله دی می یا کی باشقه عصیانچی گروه لر، اولر بیلن نهایتده یقین علاقه ده لر.

اونینگ ایتیشیچه ، منطقه ده جنگریلردن تشقری، بوگون هم اونلب قوراللیلرگه ایگه سابق مجاهد الدین قوماندانلری هم بار.

عیان بولیشیچه ، سونگی هجوم آرتیدن ترکمنستان نینگ افغانستان ده گی قنسوللیگی رهبری هرات حاکمی بیلن اوچورشگن.

افغانستان تمانیدن چیگره حدودلریده نظارت کوچی تیریش، قوشونلر سانینی کوپیتیریش و بنگی وار ماده لر قاچاقچی لریگه قرشی ثمرلی کوره شیش لرینی طلب قیلگن .

بوگون بی بی سی اوزبیک خذمتی صحبت لشیشگه موفق بولگن افغانستان لیک مسئوللرگه کوره، حاضر حدودگه قوشیمچه عسکرلر یوباریلگن و وضعیتنی کیچه و کوندوز نظارت ایتیشگه قربلری ایتدی.

افغانستان غربیدن آلینگن خبرلردن معلوم بولیشیچه، موجود وضعیت سبب، اوز آرا چیگره ده تورلی یوکلر آرتیلگن و پاکستاندن کیلگن ایککی یوزدن آرتیق یوک موتری توپله نیب قالگلن.