خوف سیزلیک تشویشلری باعث 396 مرکز فعالیت دن توشیشی ممکن

افغانستان سيلاولر مستقل كميسيوني مسووللري جمهور رييسليك وولايت كينگش سيلاولري نينگ بيرقطار آواز بيريش مركزلري خوفسيزليگي ني تامينلنش باره سيده تشويش بيلديريشگن.

بو كميسيون رييسي محمد يوسف نورستاني، مملكت ايچكي ايشلروزيرليگي تمانيدن مذكور مركزلري خوفسيزليگي آواز بيريش جريانيده تامينلنيشي باره سيده بيلديريلگن ايشانچ گه قره مه ي، اولر هنوزهم تشويشده ايكنليگي ايتگن.

اوتگن شبنه كوني هم بي بي سي بو كميسيون نينگ فاريابده گي 200 آ واز بيريش مركز ني ياپيش حقيده گي قراري باره سيده خبر بيرگندي.

سيلاولر مستقل كميسيوني سوزچيسي نورمحمد نور، بو نگه مركزلرنينگ خوفسيزليگي باره سيده كامل ايشانچ بيلديريلمه گني ني سبب قيليب كورستگن.

او افغانستان بويلب ايريم تومنلرده كته خوفسيزليك تهديدلر موجود بوليب، اولر كميسيون خادملري و سيلاو خوفسيزليگي ني تامينلشگه قادر بولمه گنليكلري باره سيده افسوس بيلديرگن.

نورجنابلري، بو مسله ني جمهور رييسگه هم ييتكزيشگني ني معلوم قيلگن.

نورنينگ ايتيشيچه، حاضرگي كونده افغانستان 15 ولايتيده گي 396 آواز بيريش مركز خوفسيزليك تهديدلر باعث ياپيليب قالگن.

اونگه كوره، افغانستان بويلب 6775 آواز بيريش مركزنينگ فعال بوليشي كيره ك.

نور جنابلري بدخشان ولايتي نينگ بيش تومنيده سيلاو اوتكزيلمسليگي حقيده نشر ايتيلگن خبرني رد ايتيب، مذكور ولايت نينگ ايريم منطقه لريده خوفسيزليگي يامان ايكنليگي ني تصديقله گن.

شنبه كوني هلمند ولايتيده سيلاو مستقل كميسيوني رييسي قدرت الله قريشي هم بي بي سيگه خوفسيزليك تهديدلر سبب آواز بيريش جريانيده بو ولايتده هر اوچ مركزدن بيرته سي ياپيليشي ممكنليگي باره سيده آگاه لنتيرگندي.

اونگه كوره، حمل آيي اون آلتينچيسيده 219 مركزدن فقطگينه 147 مركز فعال بوليشي ممكنليگي ني معلوم قيلگن.

باشقه تماندن افغانستانده جمهور رييسليك سيلاو كمپاينلري باشلنگني گه بير آي دن كوپ وقت بوله ياتگني قره مه ي، بو مدت ده اونلب تنينچ اهالي يول چيككه سيگه اورنه تيلگن ماينلر عاقبتيده هلاك بوليشگن.