نوروز بيره مي پغمانده ايمس، سرايده اوتكزيله دي

Image copyright ARG
Image caption نوروز بيره مي پغمانده ايمس، سرايده اوتكزيله دي

افغانستانده نوروز بيره مي ني اوتكزوچي كميسيون، خلق ارا نوروز بيره مي پغمان منطقه سيده ايمس، بلكه افغانستان جمهور رييسليك سراييده اوتكزيليشي گه قرار قبول قيلگن.

بو كميسيون مسووللري بونگه پغمان ده گي قوريليش ايشلر بيتكزيلمه گني ني سبب قيليب كورستگنلر.

ايتيليشيچه، بو خلق ارا نوروز بيره مي ده بيرقطار مملكتلرنينگ يوقاري مرتبه رسميلري اشتراك ايته دي.

نوروز بيره مي اوتكزيليشي اوچون تشكيل ايتيلگن كميسيون اعضاسي كبير حقمل نينگ بي بي سيگه ايتيشيچه، بو بيره م آلديندن آلدين قرار اساسيده اوتكزيله دي، اما پغمان ده ايمس، بلكه جمهور رييسليك سراييده بوليب اوتيشي ممكن.

او پغمانده خلق ارا نوروز بيره مي ني نشانلش اوچون آليب باريله ياتگن قوريليش ايشلر بيتمه گني ني سبب قيليب كورستدي:" مين كميسيون طرفيدن سيزگه ايته آله من كه او منطقه ده نوروزني نشانلش اوچون اساسي شكلده تيارگرليك كوريلمه گن. بنا لر بيتمه گن سبب شو قرار آليندي. بوندن باشقه سبب يوق ديب اويله ي من".

افغانستان دولتي بوندن آلدين بو بيره م ني كابل غربيده گي پغمان دم آليش منطقه سيده نشانلشگه قرار قبول قيلگندي و بير ييلدن بويان پغمان قصري و يوللري نينگ تعميرلش ايشي باشلنگندي.

حقمل جنابلري، پغمان ده هم بيرقطار مراسم اوتكزيليشي ممكنليگي دن خبر بيردي، اما بو حقده تفصيلات بيرمه دي.

بو ييل افغانستان ميزبانليك قيله ديگن خلق ارا نوروز بيره مي مراسميده بيرقطار قوشني مملكتلر رهبرلري نينگ هم اشتراك ايتيشي كوتيله دي.

بيرلشگن ملتلر تشكيلاتي بوندن بيش ييل مقدم، نوروزني معنوي ميراث صفتيده تنيشتيرگن سونگ، بيرقطار مملكتلر جمله دن تاجيكستان، توركمنستان و ايران بو كون ني باشقه مملكتلر رهبرلريني چقيريب نشانلشديلر.

اوتگن ييل توركمنستان نوروزني نشانله دي اونده منطقه ده گي بيرقطار مملكتلر رهبرلري جمله افغانستان، ايران و پاكستان اشتراك ايتگندي.