افغانستان تاجيكستان بيلن بيرنيچه كيليشوونامه امضاله دي

Image caption افغانستان حكومتي بوندن ايكي كون آلدين نوروز بيره مي نشانله نش محلي پغمان دن جمهور رييسليك سراييگه اوزگرتيريلگني ني اعلان قيلدي.

تاجيكستان جمهور رييسي امام علي رحمنوف نوروز خلق ارا بيره مي ده اشتراك ايتيش اوچون كابلگه كيلگن.

او بو بيره م بهانه سي بيلن اوزي نينگ افغانستان همكسبي حامدكرزي بين بيرنيچه ايكي تمانلمه كيليشوونامه امضاله گن.

تاجيكستان جمهور رييسي ناتو كوچلري افغانستان ني ترك ايتگن سونگ، بو مملكت ده تينچليك تامينلنيشي مملكتي و منطقه اوچون مهم ايكنيني تاكيدله گن.

جمهور رييسليك سرايي قوشني مملكتلر رهبرلري ني كوتيب آليش اوچون تيارلنگن. سراي ايچكريسي بو مملكتلر بيراغلري بيلن بيزه تيلگن.

افغانستان جمهوررييسي حامدكرزي بوگون مطبوعاتچيلر حضوريده بو بيره م نينگ بيرينچي مهماني تاجيكستان جمهور رييسي امام علي رحمنوف ني كوتيب آلدي.

ايكله رهبر شونينگ ديك، ايكي تمانلمه همكارليكلر كيليشوونامه گه هم قول قوييشدي:"بيز ايكله ميز منطقه و دنيا وضعيتي ني محاكمه ايتديك، بوندن تشقري بيز ايكله مملكت مناسبتلري جمله دن تجارت، اقتصاد، باردي كيلدي، تيمير يول و سياسي مسله لر باره سيده بحث قيلديك".

شونينگ ديك بو كيليشوونامه ني تشقي ايشلر، اخبارات ومدنيت وزيرلري، ايكله مملكت نينگ ملي راديو تلويزيونلر مسووللري امضالشدي.

مذكور كيليشوونامه گه بنا، ايكله مملكت تجارت ،اقتصادي سرمايه ياتقيزيش و مدني همكارليكلر بوليملريده همكارليك قيليشلري ممكن.

تاجيكستان جمهور رييسي امام علي رحمن، خارجي كوچلر افغانستان ني ترك ايتگن سونك، بو مملكت نينگ تينچليك بيلن تامينلنيشي تاجيكستان و منطقه فايده سيگه ايكنيني تاكيدله دي:"تاجيكستان افغانستانده گي تينچليك ورواجلنيش ني منطقه رواجلنيشيگه بيواسطه باغليق بيله دي. بيز افغانستان نينگ منطقوي شانهاي تشكيلاتي اعضاليگي قوشيليشيني خواهله يميز".

افغانستان حكومتي بوندن ايكي كون آلدين نوروز بيره مي نشانله نش محلي پغمان دن جمهور رييسليك سراييگه اوزگرتيريلگني ني اعلان قيلدي. ايتيليشيچه، بو مراسمده نوروز ني نشانله يديگن حوزه ده گي مملكتلر رهبرلري اشتراك ايته دي.

اما بو بيره م عرفه سيده نابرقرارليك و طالبان نينگ هجوملري خوفسيزليك تشويشلرني آتيرگن.