اهالی نینگ آواز بیریش معیارلری قنچه لیک اوزگرگن؟

شده اهالي دن 73 فايزي نامزدلرگه اولرنينگ حياتي يخشي لنيشي توغريسيده گي برنامه لريني كوريب آواز بيريشلري كورستيلگن.

اما باشقه بيرتعداد اداره لر بو اوزگريش شهرلرده چيكلنگني ني ايتيب، تومنلر و قيشلاقلرده اهالي هنوز هم قومي، تيل و مذهبي لحاظ دن راي بيريش بيريشي ني تاكيدله گن. بو تحقيقاتلرده شونينگديك، قوم باشليقلري، مسووليت سيز قوراللي لر وزوره وان شخصلر بو سيلاوگه هم تاثير قويگني كورستيلگن. افغانستانده فرقلي فكر و انديشه گه باغليق تورلي خيل قوملر و گروه لر حيات كيچيره دي. بوتفاوتلر بي شبهه سونگي اون ايكي ييل سياسي قرارلرده بي تاثير بولمه گن. 2001 ييلده طالبان حاكميتي اغده ريلگني و افغانستانده ينگي حكومت وجود كيلگني دن سونگ، خلق ايكي جمهور رييسليك، ايكي پارلمان وشونينگ ديك، ايكي ولايت كينگش سيلاوني باشدن كيچيردي. اوتگن سيلاولرده تحليلچيلرگه كوره، اهالي قومي، ايتنيك و سياسي علاقه لر اساسيده آواز بيريشگن. اما ينگي تحقيقات ده افغانستان خلقي نينگ سيلش معيارلري اوتگن سيلاولرگه قره گنده اوزگرگن. فيفا يا افغانستان ايركين و عدالتلي سيلاو اداره سي سونگي ده 34 ولايت ولايتده بو حقده تحيقات اوتكزگن. بو تحقيقات ده 70 فايزدن آرتيق افغانلر يشش حياتلري يخشي لنيشي اوچون لايحه توزگن نامزدلرگه راي بيريشلريني ايتيشگن. بو فكر سوره شده تورت مينك دن زياد آدم و بيرقطار تحليلچيلر صحبت قيليشگن. فيفا اداره سي رييسي نادر نادري آواز بيراووچيلرنينگ انديشه لري اوزگرگني باره سيده گپيره دي:" اهاليدن 73 فايزي صلح ني تامينلشگه قادر بوله ديگن شخصگه آواز بيريشلريني ايتيشگن. اهالي دن 41 فايزي تعليم وتربيه سيستملريني كوچه يتيرووچي آدم ني حمايه قيليشيني ايتگن. 39 اهالي اقتصاد ني رواجلنتيرووچي نامزدگه راي بيريشلريدن خبر بيريشگن. و 34 فايز اهالي عدالت ني تامينلاوچي گه راي بيريشلريني ايتيشگن". بو فكر سوره شده اهالي شونينگ ديك كيله جك جمهور رييس دن ساغليق خذمتلري يخشي لنيشي، زراعت تيزيملري كوچه يشي و سياسي تيزيم اوزگرتيريليشي ني طلب قيليشگن. سيلاولر و آواز بيراووچيلر باره سيده افغانستان تحليلچيلر ترماغي هم تحقيقات اوتكزييب، بوحقده گزارش نشر ايتگن. بو ترماغ متخصصلري تخار، هرات و غور ولايتلريگه سفر قيليب، او منطقه لر اهاليسي بيلن سيلاو معيارلري باره سيده صحبتلشگن. بو ترماغ اعضاسي عيبد علي ، اهالي نينگ كيم گه راي بيريش انديشه سي اوتگن ييللرگه قره گنده اوزگرگن دييدي:" اوتميشگه قره گنده حاضر آدملرنينگ فكر وانديشه لر اوزگرگن. مثال اوچون ايته آله من 2010 ييلده گي پارلمان سيلاولريده آدملر قومي و ايتنيك لحاظ دن آواز بيريشدي.اما كيينچه ليك آدملرنينگ انديشه اوزگردي، وكيللر بيرگن وعده لريني عملي قيله آلمه ديلر". كابل استراتيژيك تحيقات مركزي هم بو باره ده گزارش نشر ايتيب، شهرلرده اهالي نينگ شخصيتلر و نامزدلر برنامه لري گه نسبتآ قره شلري آشگنيني ايته دي. بو مركز مسوولي عارف رحماني گه كوره، حاضرگي شرايطده نه نامزدلر و نه هم آواز بيراوچيلر قيسي برنامه لر استراتيژيك بوليب، بولمسليگني ني بيليشمه يدي:" كابل استراتيژيك تدقيقات مركزي نينگ حساباتيگه كوره، اهالي نينگ سياسي فكر و ملاحظه لري باشقه سياسي شخصيتلرنينگ لايحه برنامه لريگه نسبتآ اوزگرگن. اما هم آواز بيرووچي وهم نامزدلر موجود اقتصادي، سياسي، مدني وباشقه بحرانلرني قنده ي برنامه لر آرقه لي برطرف ايتيليشيني بيليشمه يدي". اما باشقه بيرقطار اداره لرنينگ تيكشيروولري باشقچه نتيجه بيرگن. صلح اوچون تحقيق ناملي اداره سي قندوز ولايتيده آدملرنينگ فكريني اورگنگن. بو اداره مسوولي ميرويس وردك، شهرده گي آدملرنينگ فكر وانديشه سي سيلاولرگه نسبتآ اوزگرگن دييدي:" بوييرده فرق موجود، ملكه لي و اوقيگن آدملر نامزدلرگه اولرنينگ برنامه لريني كوريب راي بيريشه دي. بولرنينگ ساني جوده هم آز. اما تومنلر وقيشلاقده گي آدملر قومي شكل ده آواز بيريشه دي". افغانستان بيليم لر اكادمي ده گي منطقوي تدقيقات مركزي رييسي غفور ليوال، شهرلرده اوزگريش يوز بيرگن، اما قيشلاقلرده هنوز هم قومي معيارلر حاكم دييدي:" اهالي نينگ سيلاولر گه نسبتآ اوزگرگن معيار وانديشه لريگه نيمه لر سبب بولگن؟ بو اوزگريشلر اجتماعي گروه لرنينگ قنده ي قتلميده يوز بيرگن؟ بوحقده جماعه شناش و بيليم يورت استادي گلابشاه اماني:" اجتماعي بيرنيچه گروه آره سيده اوزگريش يوز بيرگن. مثال اوچون عياللر، ياشلر و عالي معلوماتلي شخصلرده اوزگريش پيدا بولگن. بونگه يگانه عامل هم اولرنينگ عالي معلوماتلي بولگني دير. بولر اكثرآ نامزدلرگه اولرنينگ برنامه لري و لايحه لريني كوريب راي بيريشه دي. اما سوادسيز شخصلر عنعنوي روشده راي بيريشه دي". شونگه قره مسدن محلي زوره وان شخصلر، ناقانوني قورالي گروه لر و قوم باشليقلري هنوز هم شهرلرده كته تاثيرگه ايگه. اما اوتگن اون ايكي ييل دواميده اهالي نينگ آواز بيريش انديشه و معيارلري اوزگرگني كيله سي شنبه ده بوليب اوته ديگن سيلاو نتيجه لريده معلوم بوله دي.