يوزلب آدم ايشله يديگن فابريكه لر قيته تيكلنه ديمي؟

بلخ ولايتي نساجي فابريكه سي بوندن 48 ييل مقدم قوريلگن. بو فابريكه ده صفتلي تورلي خيل كاله لر ايشلب چيقه ريلر ايكن، اما حاضر فعاليت دن توشيب، اعتباردن چيتده قالگن. شونگه قره مسدن فقط بير بوليمي يعني ايپ ايشلب چيقه ره ديگن ماشينلري ايشلب تورگن. بو بوليمده تورته عيال ايرته دن كيچگچه ايشلشه دي.

مزارشريف نساجي فابريكه سي مسووللري، اوتگن اون ايكي ييل دواميده بو فابريكه مملكت ده گي باشقه فابريكه لركبي قيته تيكلنمه ي، اعبتاردن توشيب قالگني ني ايتيشماقده.

سابقلر بو فابريكده ايشلب چيقه ريلگن توارلرحتي خارجي مملكتلرگه هم صادر ايتيلردي، دييدي فابريكه رييسي انجنير محمدشريف.

اونينگ ايتيشيچه، نساجي فابريكه لر قيته تعميرلنسه، يوزلب آدم اوچون ايش زمينه سي مهيا بوله دي و دهقان لر اقتصادي هم رواجلنيب، پخته محصولاتي دن كته درآمد قولگه كيله دي.

اونگه كوره، اوتميشده 7 يوز آدم بو فابريكه ده ايشلب، كته معاش قولگه كيريترايكن، اما حاضر بار يوغي 16 نفر ايشله يدي خلاص.

باشقه تماندن بونينگ يانيده تصدي خصوصي فابريكه نسبتآ فعال. سوو ايديشلري، باله لر اياق كييمي و شونگه اوخشه گن بيرنيچه اسبابلرني ايشلب چيقه ره دي. اما بو توارلر بازار احتياجليگي ني برطرف ايته آلمه يدي.

مسووللرگه كوره، خصوصي تصدي فابريكه لرهم دولت تمانيدن حمايه قيلينمه يدي و تاجرلر اوز بايليكلريدن صرفلب توريشگن.

بلخ ولايتيده نساجي شامل سيلو و كود برق فابريكه لري موجود، اما بولرنينگ اكثر قسمي شرايط گه ماس خذمت قيليشگه قادر ايمس و ايشلب چيقه ره ديگن توارلريگه خارج دن وارد قيلينه ياتگن اشيالركته تاثير قويگن.

افغانستان ده اوتگن اوتيز ييل اوروش جريانيده بوتون بايليكلر ويران ايتيليب، مينگلب آدم ايشدن محروم قالدي. بوله جك جمهور رييس نامزدلري ايشدن توشيب قالگن فابريكه لرني قيته تعميرلشي ني وعده قيليشگن، اما بولرنينگ وعده لري قنچه ليك عملي بوليشي، حاضرچه معلوم ايمس.