اولوسی جرگه مرکزی بانک رییسینی استیضاح قیلیشگه قرار آلدی

Image copyright AFP
Image caption بانک رییسی بوگون اولوسی جرگه گه جوابگرلیک اوچون حاضر بولیشی کیره ک ایدی، اما جلسه گه اشتراک ایتمه گن.

افغانستان ملی کینگش اعضالری مملکت مرکزی بانک رییسی نورالله دلاوری نی زوردلیک بیلن استیضاح اوچون مجلسگه چقیرتیریلیشی باره سیده قرار قبول قیلیشگن. بو بانک رییسی بوگون اولوسی جرگه گه جوابگرلیک اوچون حاضر بولیشی کیره ک ایدی، اما جلسه گه اشتراک ایتمه گن.

افغانستان مرکزی بانک رییسی نورالله دلاوری بوندن آلدین هم ملی کینگش تمانیدن جوابگرلیک ییغینیگه چقیرتیریلگندی. اما او بو چقیریشلرده اشتراک ایتمه گندی.

اولوسی جرگه بیرقطار اعضالری دلاوری جنابلری نینگ استیضاح اوچون چقیرتیریلیشی کیره کلیگی و برچه اعضالرنینگ ایشانچ آوازینی قولگه کیریتمه گن تقدیرده، وظیفه سیدن بوشه تیلیشی ضرورلیگی نی تاکیدله ماقده لر.

بو وکیللردن بیری امیرخانیار:"افغانستان بانکی ده بیریله یاتگن آیلیکلر هیچ قانون گه تینگ ایمس. بو بانک رییسی و معاونلری اوز باشیمچه قانون چیقه ریب، خادملرگه 7 مینگ، 8 مینگ دالر معاش بیره دیلر. مینینگ قولیمگه کیلگن بیر رویخط ده اداره آمریگه بیر لیک و 18 مینگ افغانی معاش بیریله یاتگنی کورستیلگن. بونده ی قنده ی آمر دیرکه بونگه ایکی مینگ دالر معاش بیریله دی؟ شوکبی مصلحتچیلریگه ایکی لک افغانی معاش بیریله دی. تورت بیش مراتبه جرگه گه چقیرتیردیک، اما بیرمرته هم کیلمه دی".

اما مرکزی بانک اداره سی اولوسی جرگه اعضالری نینگ بوتنقیدلرینی رد ایتیب، خادملرگه ملکه سی و شایسته لیگی اساسیده معاش بیریله یاتگنی نی ایتماقده. بو بانک اداره سی معاونی خان افضل اده وال:"هیچ بیر خادیمیز ایکی مینگ دالر دن آرتیق معاش آلمه یدی، بوادعانی بیز رد ایته میز. بیز خادیملریمیزگه ملکه سینی کوریب آیلیک تعیینله گنمیز. مرکزی بانک افغانستان برچه بانکدارلیک تیزیمینی نظارت ایته دی".

عین حالده، بو کیللر، افغانستان مرکزی بانک رییسی نینگ مجلس اعضالریگه اعتبار بیرمه گنلیگی، مجلس نینگ مالیه کمیسیونیگه بانک خصوصیده ییتیب کیلگن شکایتلر، افغانی پول نینگ خارجی پوللربرابریده ارزیشی قویی توشه یاتگنی و بیرقطار مهم مسله لر سبب، چقیرتیریله یاتگنیگه دلیل قیلیب کورستماقده لر.

مرکزی بانک رییسی تورتینچی بار دیرکه، اولوسی جرگه تمانیدن چقیرتیریلماقده. اما او بو چقیرتیریشلرگه اعتبار بیرمه گن.

اون ییلدن بیری فعالیت قیلیب کیله یاتکن بو بانک تورلی خیل تنقیدلرگه روپه ره بولگن. اما بو بانک رییسی نینگ مجلسگه قنده ی دلیلر سبب، بارمه گنی هنوزگچه معلوم ایمس.

ایتیلیشیچه، او بوندن آلدین خارجگه سفر قیلگن.