افغانستان مدافعه وزيرليگي: پكتيكاده 49 جنگري و بيش عسكر هلاك بولگن

پاكستان بيلن چيگره داش بولگن پكتيكا نينگ ايريم حدودلري ناتينچ.

افغانستان مدافعه وزيرليگي نينگ اعلان قيليشيچه، كميده 500 ايچكي و تشقي عصيانچي نينگ پكتيكا ده گي حربي قرارگاه گه قيلگن قوراللي هجومي نتيجه سيده بيش ملي اردو عسكري و 49 جنگري هلاك بولگن.

بو وزيرليككه كوره، جنگريلر زيروك ناملي حربي قرارگاه گه هجوم قيلگني جريانيده روي بيرگن توقنه شووده تورت عسكر اوليب بيرته سي اسير و بيشته سي ايسه، يره لنگن.

مدافعه وزيرليگي، هجوم قوشيمچه كوچ منطقه گه يوباريلگن دن سونگ، شدتلنگن و خارجي كوچلردن هوايي ياردم طلب قيلينگني ني ايتگن.

وزيرليككه كوره، جنگريلرنينگ بيرقطار جسدلري منطقه ده قالگن. اما طالبان هنوزگچه بوحقده فكر بيلديرمه گن.

پكتيكا ولايتي پاكستان بيلن چيگره داش بوليب، انده سنده تينچسيزليك روي بيريب توره دی.

باشقه بير خبرگه كوره، لغمان ولايتي محل مسووللري عصيانچيلرنينگ هجومي نتيجه سيده اوچ پوليس عسكري هلاك بولگني دن خبر بيريشگن.

لغمان حاكيمي سوزچيسي سرحدي زواك نينگ ايتيشيچه، علي نگار تومنيده جايلشگن قرارگاه اوتگن كيچه قوراللي مخالفلر تمانيدن هجوم گه آلينيب، باشقه بير پوليس يره لنگن. او هجومچيلرگه هم تلفات ييتكزيلگني ني ايتگن.