شمالده گي سوو تاشقينلريده قربان بولگنلر ساني 123 كيشيگه ييتدي

سونگي معلوماتلرگه كوره، جوزجان نينگ قوش تيپه، درزاب و خواجه دوكوه تومنلريده روي بيرگن طبيعي آفت ده اولگنلر ساني 62 كيشي گه ييتگن. 85 نفر هنوزگچه لادرك يوقالگن. اولرنينگ جسدلري حاضرگه قدر قيديريلماقده.

سرپلده ايسه، سوو تاشقينيده 28 كيشي قربان بولگن، 13 كيشي لادرك يوقالگن.

بولايت محل مسووللري نينگ ايتيشلريچه، 370 حويلي ـ جايلري بوتكول ويران ايتيلگن.

شونينگ ديك فارياب دن آلينگن سونگي خبرلرگه كوره، قربانلر ساني 33 نفرني تشكيل بيره دي.

پنجشنبه كيچه سي افغانستان شمالي جوزجان، سرپل وفارياب ولايتلريده روي بيرگن طبيعي آفت عاقبتيده يوزلب آدم حياتي ني قولدن بيرگن.

سوو تاشقيني قربانلري باله لر، عياللر و ايرككلردن عبارت بولگن. كته سانده گي قاره ماللر هم بو حادثه ده هلاك بولگن.

مينگلب هكتار ايكينزار ميدانلري سوو آستيده قالگن.

جبرديده لرنينگ اكثريتي حاضر آچيق آسمان آستيده كون كيچيرماقده لر، اما بيرقطاريگه ياردم بيرووچي تشكيلاتلر تمانيدن چادير ـ خيمه لر ييتكزيب بيريلگن.

ايچكي وتشقي انسان پرور تشكيلاتلر اوون، ياغ، كمپل، چادير و باشقه كيره كليگي اسبابلرني جبركوگنلرگه ييتكزيب بيرماقده لر.

شونينگ ديك، ساغليق بوييچه خذمت كورسته ديگن اداره لر مذكور عايله لرگه طبي داري ـ درمان هم ييتكزيب بيرماقده لر.

اما سرپل ولايتي محل مسووللري، هنوزگچه سوو تاشقيني قربانلريگه تيز ياردم ييتيب بارمه گني ني ايتيشگن. جبرديده لرنينگ تاغ بغرلري و تيپه ليك جايلرده باش پنه سيز حالت كون كيچيره ياتگني ايتيله دي.

سرپل ده روي بيرگن سيلابده 370 دن آرتيق حويلي ـ جايلر بوتكول ويران ايتيلگن. باغ و ايكينزارميدانلري بوتونلي سوو آستيده قالگن.

فارياب ده هم پنجشنبه كيچه سي روي بيرگن سوو تاشقينلريده شدت بيلن ياققن جله سببچي بولگن. حويلي ـ جايلر، ايكينزارميدانلري و باغ درختلري بوتكول ويران قيلينگن.

افغانستان جمهوررييسي حامدكرزي واقعه يوزه سيدن جبرديده لرگه تيز ياردم ييتكزيب بيريليشي باره سيده دستور صادر قيلدي. شو مناسبت بيلن بوگون جمهور رييس نينگ ايكينچي معاوني همده طبيعي آفتلرگه قرشي كميته سي رييسي كريم خليلي فارياب، جوزجان و سرپل ولايتلريگه سفر قيلگن. او بيرينچي ده فارياب گه كيليب، جبرديده لرگه تيزياردم عملگه آشيريليشي باره سيده وعده قيلگن.

خليلي جنابلري شونينگ ديك، جوزجان و سرپل ولايتلريگه باريب، حادثه محللريني يقيندن كوزه ته دي.

افغانستان ده تاغلي مملكت بولگني سبب، هر ييلي شونده ي حادثه لرگه گواه بوليب، روي بيره ديگن طبيعي آفتلر يوزلب آدم نينگ اوليميگه ضامن بوليب كيلگن. اما دولت هنوزگچه سوو تاشقينلري يوز بيره ديگن منطقه لرني بو آفت دن اسره ش اوچون هيچ قنده ي چاره تدبير كوريب چيقمه گن.