شمالي اوچ ولايتده سوو تاشقينلريده اولگن ويوقالگنلرساني 188 كيشيگه ييتگن

Image copyright BBC World Service

سونگي معلوماتلرگه كوره، جوزجان نينگ قوش تيپه، درزاب و خواجه دوكوه تومنلريده پنجشنبه كيچه سي روي بيرگن سيلابلرده 66 كيشي قربان بوليب، 31 كيشي لادرك يوقالگن. اولرنينگ جسدلري هنوزگه قدر تاپيلمه گن.اما حادثه ده جان سقلب قالگن آدملر چاديرلر آستيده كون كيچيرماقده لر. اولرگه ايكي كون دن بيري تيز ياردم ييتكزيب بيريلماقده. جوزجان فوق العاده كميته سي رييسي محمدحسين صالح خواجه دوكوه تومنيگه بير نيچه بار ياردم عملگه آشيريلگن، اما درزاب و قوش تيپه گه ايسه، خوفسيزليك مسله لر سبب، ياردم ييتكزيش جرياني عملگه آشيريلمه گني ني معلوم قيلگن.قربانلرگه دولت و ياردم بيرووچي تشكيلاتلر تمانيدن آذيق آوقت و كييم كيچك ياردم قيلينگن. اما جبرديده لر ييتكزيلگن ياردملر ييترلي بولمه گني ني ايتيشگن. بيرلشگن ملتلر تشكيلاتي نينگ يوناما اداره سي ايرته گه بيرمقدار ياردم ييتكزيب بيريشيني وعده قيلگن.سرپلدن آلينگن سونگي خبرلرگه كوره، قربانلرساني 30 كيشي و يوقالگنلر ايسه، 18 نفرگه ييتگن.ولايت محل مسووللري، جبرديده لر اوچون ياردم ييتيب بارگن، اما هنوزگچه ترقه تيش جرياني باشلنمه گنيني ايتيشگن. ايتيليشيچه، ييتيب بارگن ياردم تيزليك بيلن ترقه تيله دي.سرپل حاكمي عبدالجبار حقبين، سوو تاشقينلريده 2500 ته قاره مال نابود بوليب، 9 مينگ جريب ايكينزارميدانلري همده 8 يوز تورر جاي بوتونلي ويران ايتيلگني ني معلوم قيلگن. فاريابدن آلينگن سونگي خبرلرگه بنآ، بولايت نينگ بير نيچه تومنلريده يوز بيرگن سوو تاشقينلريده قربان بولگنلر ساني 43 كيشي گه ييتگن.فارياب حاكمي محمدالله بتاش نينگ ايتيشيچه، بوندن تشقري 8 مينگ قاره مال، 2200 حويلي ـ جايلر، 14 مينگ جريب ايكنيزار ميدانلري و كميده 85 كيلومتر قتناو يول بوتونلي ويران ايتيلگن. سوو تاشقينلري شمالغربي بادغيس ولايتيدن 14 كيشي نينگ حياتيگه ضامن بولگن. جبرديده لرياردم ييتكزيب بيريلمه گني دن شكايت قيليشگن.بو حادثه يوزه سيدن افغانستان جمهور رييسي ايكينچي معاوني كريم خليلي اوتگن كون جبرديده منطقه لرگه سفر قيليب، ضررلنگنلر ييترلي درجه لي ياردم ييتكزيب بيريليشي باره سيده وعده بيرگن. او شونينگ ديك، اوچ ولايت حاكيملريگه اينگ سونگي تلفاتلر و خساره لر ميزاني ني انيق لشتيريشگه وظيفه بيرگن.سونگي سوو تاشقينلريده جوزجان ولايتي نينگ اوچ تومني اهاليسي قتيق ضررلندي. بو قربانلرنينگ اكثريني باله لر و عياللر تشكيل بيرگن.