بدخشانده ضررکورگن منطقه عاموی قبرقیلینیشی اوچون قیدیرووعملیاتی توخته تیلگن

افغان رسمی لریگه کوره بدخشانده ییرکوچگیسی نتیجه سیده توپراق آستیده قالگن کیشی لرنی قوتقریش عملیاتی توخته تیلگن.تلفات لررقمی انیق ایمس، بیراق جمهور رئیس اورین باسری دفتری گه کوره منطقه ده بیر عاموی قبر قوریلیش احتمالی بار.

عین شو مناسبت بیلن بوگون ملی عزا اعلان ایتیلدی.

افغانستان دولتی رسمی لری گه کوره قوتقروو عملیاتی بوولایت نینگ ارگو تومنیده گی ییر کوچگیسی سبب توپراق تگیده قالگن لرباره سیده توخته تیلگن.

افغانستان جمهور رئیسی اورین باسری محمد کریم خلیلی نینگ دفتررئیسی عباس بصیربو حادثه تلفاتی هلی گچه انیق ایمس لیگی نی ایته دی، بو حادثه نی تیکشیریش وایشلرنی موافقلشتیریش ولایت بوییچه تشکیللنگن کمیسیون افغانستان جمهور رئیسی اورین باسری گه بو حادثه ده 255کیشی دره ک سیز بولگنی نی گزارش بیرگن وایکی عیال نینگ جسدی توپراق آستیدن چیقریلگن.

جمهور رئیس لیک دفتری تاماندن ترقه تیلگن بیاناتده کیلیشیچه افغانستان بیراغلری ملی عزا کونی مملکت ایچکری سیده وهم مملکتده تشقریده گی ایلچی خانه لریده یریم کوتریله دی.

اما بوندن آلدین ايكي آذيق آوقت ياردم قيلاوچي خلق ارا تشكيلات محلگه ييتيب باريب، اولگنلر ساني ني 2700 كيشي ديه تخمين قيلگن ایدی.

اوتگن كون بدخشان نينگ ارگو تومني ده يوز بيردي و 300 دن آرتيق اوي تاغ ته گيده قالگن.

افغانستان ده دولت ونا دولت تشكيلاتلر توپراق آستيده قالگنلرني قوتقه ريش اوچون سعي و حركت قيلماقده لر.

بدخشان حاكيمي ولي الله اديب نينگ بي بي سيگه ايتيشيچه، اوتگن كوندن بيري قربانلرني قوتقه ريش عملياتي دوام ايتماقده.

اديب گه كوره، محل اهالي اهالي قوللريده گي اسباب اوسكونه لر بيلن قوتقه ريش عمليات ني باشله گن، اما اولرني قوتقه ريش امكاني موجود بولمه گن. بدخشان حاكيمي:"بيز اوتگن كون حادثه جاييگه باريب، ملي بيردمليك اداره سي رييسي و محل اهاليسي بيلن صحبتلشديك، اولر بيزگه 2500 نفر توپراق آستيده قالگني ني ايتيشدي. قربان لردن بيرتعدادي نينگ جسدلريني آليب چيقرديك".

دبليو ايف پي خلق ارا آذيق آوقت تشكيلاتيگه كوره، 2700 كيشي قربان بولگن. بو تشكيلات حاضرگه قدر كميده 700 عايله گه ياردم ييتكزيب بيرگن و بو ياردم ني باشقه بير هفته گه قدر دوام ايتديريشي ني ايتگن.

بو تشكيلات گه كوره، قربان لر تشقري باشقه 700 عايله هم اوز اوي جايلريني ترك ايتيشگن. بيريتانياليك مرلين ناملي موسسه هم جبرديده لرگه داري درمان و آزيق آوقت ييتكزيب بيرگن و بونينگ ايتيشيچه، كميده 300 عايله توپراق آستيده قالگن.

بدخشان ولايتي تومنلري تاغلي بوليب، ياردم ييتكزيب بيريش جرياني ني سستيتيرگن. يير سيلجينيشي ارگو تومني نينگ آب باريك قيشلافيده روي بيرگن و محل مسووللرنينگ ايتيشيچه، مذكور قيشلاغده كميده اون مينگ عايله حيات كيچيره ماقده ايكنلر.

اديب جنابلري، جبرديده لر آذيق آوقت، باش پنه، سوو وباشقه كيره كليگي ياردم گه محتاج ايكني ني ايتگن. افغانستان مدافعه وزيرليگي هم بير اعلاميه ترقه تيب، بدخشان حادثه سي قربانلريگه ياردم ييتكزيب بيريش اوچون بار امكانيت لردن فايده لنيشي ممكنلگي دن خبر بيرگن

. بو وزيرليك يوقاري مرتبه لي رسمي سي حاضر بدخشان گه سفر قيليب، حادثه ني يقين دن كورماقده.

بو حادثه ايچكي وتشقي عكس العمللرگه سبب بولگن. افغانستان جمهور رييسي حامدكرزي حادثه يوزه سيدن افسوس بيلديريب، بدخشانگه هييت جونتگن.

كرزي جنابلري باره ده ايكينچي معاوني كريم خليلي، طبيعي آفت گه قرشي كوره ش كميته سي رييسي، مدافعه وزيري و محلي ارگان لر اداره سي رييسي بيلن صحبت قيليب، قربانلرگه تيز ياردم ييتكزيب بيريليشيني سوره گن.

عين حالده، امريكا جمهور رييسي براك اوباما هم اوزي نينگ آلمان باش وزيري انگلا مركل بيلن اوتگن اوچره شوويده بدخشان حادثه سي گه دقت اعبتار قره تيب، امريكا خلقي طرفيدن قيغوداشليك اظهار ايتگن.

اوشونينگ ديك، جبرديده لرگه ياردم بيريشي ني وعده قيلگن. ايران تشقي ايشلروزيرليگي هم اوزي نينگ بير بياناتيده، حادثه بوييچه افسوس بيلديرگن. شو دمده اوروپا نينگ كابلده گي پوليسي حادثه قربانلري يقينلريگه قيغوداشليك بيلديرگن.

بيرلشگن ملتلر تشكيلاتي هم حادثه دن تاثيرلنگني ني اظهار ايتگن. افغانستانده روي بيرگن سونگي حادثه لرده يوزلب انسان قربان بولدي، بير هفته دن بويان اجتماعي ترماغلرده بومسله گه نسبتآ قتيق عكس العمل بيلديريلگن.

بدخشان ده گي واقعه افغانستان شمالي ده روي بيرگن سوو تاشقينلري دن بير هفته كيين روي بيرماقده. بو مسله كينگ خبرلرگه ايلنگن. شونينگ ديك، تخارده ده گي ييرسيلجيشده هم كميده 120 عايله اوي جايلريني قولدن بيردي.