افغانستان شرقیده دولتگه تیگیشلی اداره لردن بیری انتحاری لر هجومی گه توتیلدی

شرقی ننگرهار ولایتی نینگ رسمی لری هجومچی بیرگروه جلال آباد شهریده جایلشگن عدلیه ریاستی گه هجوم قیلیب وخوف سیزلیک کوچلری بیلن اوروشگن لر.

بو رسمی لرگه کوره بو توقنه شوو توشدن آلدین هجومچی لر بو اداره گه قره تیب اوق اوزیش لری بیلن باشله نیب کیتگن.

امنیتی منبع لرنینگ معلوم قیلیشیچه بوهجوم نینگ آلدینی آلیش اوچون محل گه قوشیمچه کوچلرهم ییتیب بارگن، بیراق اوروش دوام ایتماقده.

خوف سیزلیک رسمی لری حاضرگه قدر انتحارچی لرسانی قنچه لیگی باره سیده معلومات بیریشمه گن، اما ایچکی ایشلر وزیرلیگی نینگ اورین باسری جنرال ایوب سالنگی اوز تویتریده یازیشیچه هجومچی لراوچ کیشی بولیب اولردن بیری هلاک بولگن.

ننگرهارده گی بی بی سی مخبری گه کوره بو توقنه شوو باشله نیشی بیلن آغیرویینگیل قوراللرنینگ اوق آوازلری ایشیتلگن. اما بو هجوم تلفاتی باره سیده انیق معلومات قولده ایمس.

ننگرهارولایتی نینگ عدلیه ریاستی جلال آباد شهری نینگ شرقیده جایلشگن بولیب ودولتی بیرقنچه اداره لراو نینگ یانیده قرار تاپگن.

اوزینی طالبان سوزچیسی دیب تنیشتیرگن ذبیح الله مجاهد گه کوره بیر قطار خودکش کیشی لربو اداره نینگ بناسیگه باسدیریب کیرگن لر.

طالبان سوزچیسی بو هجوم نی بهارموسومیده گی یولگه قویه دیگن عملیات لری دیب اعلان قیلگن. مجاهدجنابلری نینگ معلوم قیلیشیچه بوگون بگرام هوا قونالغه سی هم راکت هجومی آستیگه آلینگن.

طالبان نینگ غرنی ده گی هجومی

افغانستان جنوبیده گی غزنی ولایتی حاکمی نینگ اورین باسری محمد علی احمدی نینگ خبربیریشیچه طالبان گیلان تومنی دن شکست گه دوچ کیلیشی بیلن بو گروه اعضالری ایرته لب تانگ چاغی غزنی شهری نینگ بیر تمانیگه هجوم قیلیشگن.

احمدی جنابلری گه کوره بو هجوم جریانیده بیر پلیس، ایکی عیال دن تشقری اینگ 5عصیانچی هلاک ایتیلیب وباشقه 8کیشی هم یره لنگن.

غزنی ولایتی جاکمی اورین باسری اوتگن هفته گی غزنی ولایتی نینگ گیلان تومنیده قوراللی بیلن دولت کوچلری اورته سیده یوزبیرگن جنگده 150طالب اولیب وبوگروه قتیق ضربه کورگنلیگی نی ایته دی.

احمدی جنابلری گه کوره طالبان بوشکست نی آلدینی آلیش اوچون غزنی شهری نینگ ایریم محلی لریگه عملگه آشیرگن هجوم لری هم یخشی یوتوق آلیب کیلیشمه گن.

عین حالده طالبان گروهی گیلان تومنی نی اوز نظارت لریگه اوتکزیب 46دولت کوچلرینی اولدیرگن لری نی معلوم قیلیشگن . بو گروه سوزچیسی دولت کوچلری گیلان تومنی دن غزنی مرکزیگه قره ب چیکینگنی نی ایتگن.

طالبان ودولت تمانیدن قیلینگن بوادعالرنی مستقل منبع لرتصدیقله مه گن.

طالبان گروهی هوا ایسیشی بیلن دولت گه قرشی حربی عملیات لرینی شدتلشتیره دیلر، دولت رسمی لری نینگ فکریچه قیشده پاکستانگه کیته دیلروبهاربولیشی بیلن اوروش جبهه لریگه قیته دیلر.

بو گروه هرییلی اوتکزه دیگن عملیات لریگه آت قویه دی. یقینده بو گروه باشله گن ینگی عملیات لریگه خیبرنام بیریشگن.

سونگی کونلرده ییریک شهرلروپایتخت کابلده کیره کلی امنیتی چاره وتدبیرآلینگن. بو چاره لرنقلیه واسطه لرنی تیکشیریب وکوزدن کیچیریش دن عبارت بولگن.