كريم الله اويغاغ: تورک بولیب تورکانه سوزه لب ای یارانلر اوخله منگ

عبدالخلیل اوغلی کریم الله اویغاغ 1368 ییل تخار ولایتي دشت قلعه تومني نينگ غازتيپه قيشلاغیده دنیاگه کیلگن. اویغاغ باشلنغیچ مكتبني توغيليب اوسگن قيشلاغيده مکتبيده اوقیب، اورته و لیسه دوره سينی دشت قلعه عالی لیسه سیده 1387 ییلده بیتیرگن. 1387 ییلده کانکورسیناوینی اوتکزگندن کیین، 1388 ییلده بلخ بیلیم یورتی ادبیات و بشری بیلیملر فاکولته سی نینگ تورکالوژی(تورک – اوزبیک تیلی وادبیاتی) بولیمیده اوقيشگه كيريب، 1391 ییلده عالی درجه ده بيتيريش حجت ني قولگه كيريتگن.

کریم الله اویغاغ طلبه لیک دوريدن بيري مطبوعات ایشلری بیلن شغللنيب، ایریم رادیوـ تلویزیون و نشرلرده ایشلب کیلماقده. جمله دن نهاد، کلید رایو سی. او عين پيتده، مزارشريف ده گي تيلويزيونلردن بيريده اوزبيكچه خبر باشليغي صفتيده خذمت قيلماقده.

اویغاغ باله لیک چاغیدن شعر و داستان یازیشیگه قيزيقيب، دنیا خیالاتلری بیلن شعربوستانیگه قدم قويگن. او غزل، قصیده، رباعی، مخمس، تورت لیک وآق شعرلر قالب لریده شعر يازه دي.

قنچه ییللردن بویان اوزبیک ودری تیللریده شعر یازیب اوچ شعری توپلم همده بیرداستان توپلمنی اوزیدن تیارله گن. بیری اوزبیک تیلیده بولگن (یوره ک قیغولری) وایککینچیسی ایسه دری تیلیده (نگاه یک دیوانه) و اوچينچی سی (اوزبیکچه سوزله ) و(یمان کونلرکونگليمده) داستان رساله سی دیر.

بیراق ایریم قیینچیلیکلرسبب اوشبو توپلملر هنوزگچه چاپ ايتيلمه گن.

قوييده گي شعرلر اونينگ ايجاديدن نمون:

اوخله منگ

اویقوبس ایندی تورینگ باتور جوانلر اوخله منگ

ایل و تیل سیزگه تینگن جانه جانلر اوخله منگ

یاییلیب یاتیش ینه عیب دیر بیزه تورک میز اخی

اوشبو ملت یاره لنگن پاسبانلر اوخله منگ

کیم لیگمیز انگله ماققه برچه لر مشتاق ایرور

بابر و تیمورگه اوخشه ب قاآن و خانلر اوخله منگ

هم علیشیرنوایی ایزله گن یولنی توتیب

آنه تیلگه بوب قراقچی ساربانلر اوخله منگ

الفاربی ،البیرونی ،الخورازمی بیزده بار

تورک بولیب تورکانه سوزه لب ای یارانلر اوخله منگ

سیز بویوک افراسیاب وهمده یافث نسلیدن

کیمگه بار شوکتلی شان شاه جهانلر اوخله منگ

اوزلیگ و اوزبیگ لیگمیز مونچه پولگه می او.

آنه تیلگه حرمت ایلب قهرمانلر اوخله منگ

ایله مه

نازنین کوزی قراه کونگلم پریشان ایله مه

جوربیرمه دلبرم حالمنی حیران ایله مه

آچ یوزینگنی بیرکوره ی سین سن پرلر ملکدن

انتظارقویب گوزه ل کوزیمنی گریان ایله مه

شوق دیدار ینینگ اوچون دیوانه من مجنون کبی

نان گداینگلیغ مینی دایم غزلخوان ایله مه

لبلرینگ دن سوریبان یاتسم قوچاغینگده همیش

آته آننگه باریب کوپ آه افــــــــــــــغان ایله مه

نی بولرچارباغلره یورسم قولینگدن اوشله بان

میندن ایری کیمسه لرگه کوپ خرامان ایله مه

ایندی اویغاغینگ نی سین یلغوزقیلیب کیتمه صنم

کویدیریب کولدی قیلیب بس !ایندی سرسان ایله مه

گوزه ل قیز

یاقیملی سوزلری کوکسمگه یاقتی

مینی تشلب سیونچیم کیمگه باقتی

یوراکیم گه گوزه ل دن باشقه بیر.یوق

توریب یولیگه کوزیمـــدن قان آقتی

سیوب قالدیم قره ب ایکی کوزیگه

قراه کوزی ایله بـــــغریمنی یاقتی

اونی قنچه سیویب کوربولدی کوزیم

کوزیم کوربولدی ومیندن اوزاقتی

ینه بیرباقسه اویغاغ دیب گوزه ل قیز

اولیب ایتسم آچوندن گپی یاقتی

نازنین

سوزله گن سوزینگه قربان مينی بیریاد ایله گیل

سينی سیوگه یمن شیرینیم مينی فرهاد ایله گیل

قیل وفالرعشوه بیرله نازنین قیلمه جفا

آی یوزینگنی کورسه تیب کونگلنی صیاد ایله گیل

کيل قراکوزینگ ایله حالیمگه باققین دلبریم

قیغو ایچره بی نوامن غمدن آزاد ایله گیل

نیچه لرکیتب مينی یانیمدن ایریلمه گوزه ل

کيل محبت اویینی سین قیته بنیاد ایله گیل

یاکبی بولدیم سینی هجرینگده ای زیباصنم

اوزگه لرنی اولدیریب بیلیمنی شمشاد ایله گیل

شفقت لی انسان

کوپ محبت بیرگوچی شفقت لی انسان دور آته

بیزگه عزت مخزنی هم آب ایوان دور آته

دایمااولاد لرینی جان باله ام دیب جان بیريب

مهرکانیگه توله هم شوکت وشان دور آته

هردایم ایله ب دعا بیزلراوچون تنگری ساری

کوزنی نوری دل مداری شمع تابان دور آته

کیچه – کوندوز کوپ رنج زحمتنی کوریب

بیزنی ساغ سقله ش اوچون دایم شتابان دور آته

آته قدر وحرمتین قیل تیک توريب اویغاغ همیش

سایه بان ومهربان هم سینگه قلقان دور آته

نازنین صنم

سوسنیم ، باغ وبهاریم مهربانیم سین اوزینگ

هم صنوبر ، زلفی چیچک جاویدانیم سین اوزینگ

رحم قیلگیل سیوگلیم ، دیق بولمه و اچچیغلمه

ایککی دنیاده امیدو آرمانیم سین اوزینگ

تنگری بیرگن سینگه حسن وصورتینگ زیباپری!

چقنه گن یولدوزکبی یارقین جوانیم سین اوزینگ

کوپ اینانیب صورتینگه مینی یولغوز تشلمه

هم گوزه للر ملکیده شاه جهانیم سین اوزینگ

قیسی تیلگه سویله سین وصفینگنی اویغاغینگ پری؟

بی نوالیک شهریده هم گلستانیم سین اوزینگ