كابل، فارياب و مزارشريف شهرلريده پارتلش صادر ايتيلدي

بوگون پايتخت كابل و فارياب و مزارشريف شهرلريده پارتلش صادر ايتيلگن. كابلده گي حادثه ده ملي مدافعه وزيرليگي خادملري نشانگه آلينگن. بو حادثه ده ایککی نفر هلاک بولگن و 15 نفر ایسه یره لنگن. اما فاريابده يوز بيرگن پارتلشده ايكي پوليس و اوچ تينچ اهالي يره لنگن.

مزارشريفده ايسه، پوليس نينگ رنجر موتريده اورنه تيلگن ماين پارتلب كيتگن و تلفات يوزه گه چيقمه گن.

حادثه بوگون ساعت 3 اطرافيده كابل شهري نينگ 16 ناحيه سيده يوز بيردي. كابل پوليس قوماندانليگي سوزچيسي حشمت الله ستانكزي بي بي سي گه، حادثه خودكش هجوم ايكنيني بيلديردي.

اوشونينگ ديك، بو حادثه ده ملي مدافعه وزيرليگي خادملريگه تلفات ييتگن ييتمه گني باره سيده انيق معلوم قولده ايمس دييدي.

بو حادثه مدافعه وزيرليگي خادملري نينگ موترلري اوتيب توره ديگن استقامت محللردن بيريده يوز بيرگن.

طالبان گروهي بوندن بير نيچه ساعت آلدين بير اعلاميه آرقه لي مذكور هجوم مسوليتيني اوز ذمه سيگه آلدي.

عين حالده، بوگون شمالي فارياب ولايتي مركزي ميمنه شهريده هم پارتلش عملگه آشيريلدي. بو پارتلشده بيش كيشي ايكي پوليس و اوچ نفر تينچ اهالي يره لنگن. هجوم ده فارياب ولايتي امنيت اداره سي باشليغي نشانگه آلينگن، اما اونگه ضرر ييتمه گن. ماين اوزاق كنترول ايته ديگن اوسكونه بيلن پارتيلگن و امنيت اداره سيگه قره شلي رنجرموترلريدن بيري قسمآ ويران ايتيلگن.

شونينگ ديك، بوگون مزارشريفده هم پارتلش صادر ايتيليب، بو پارتلشده هيچ كيم تلفات ييتمه دي. اما حادثه اطرافيده گي دكانلر شيشلري سينيب توشدي. حادثه پوليس كوچلري رنجر موتريده اورنه تيلگن ماين پارتله گني نتيجه سيده يوزبيرگن.

بلخ ولايتي امنيه قوماندانليگي خوفسيزليك آمري عبدالررازق قادري نينگ مطبوعاتگه ايتيشيچه، مذكور رنجر موتري سرپل ولايتي پوليس قوماندانليگي گه قره شلي بوليب، بوندن بير نيچه ساعت آلدين مزارشريف شهري نينگ شرقي دروازه سيده توخته تيب قويلگن:"ميمنيچه ماين سرپل ـ مزارشريف قتناو يولي آقيميده موترگه اورنه تيلگن. ايلك بار ديركه مزارشريف ده بونده ي بير حادثه يوز بيرماقده. بيز رنجرني كيلتيريب توختتگن منصبدارني تحقيق اوچون حبسگه آلديك".

اونگه كوره. حبسگه آلينگن منصبدار سرپل ولايتي امنيه قوماندانليگي منصبدارلريدن بولگن.

بوندن بير نيچه آي آلدين ولايت حاكيميتي معاوني هم شهر ايچيده پارتلش گه دوچ كيليب، بير عادي شخص قربان بولگندي.

بلخ ولايتي شمالده اينگ خوفسيز ولايت سنه له دي. اما اطراف بير نيچه منطقه لريده قوراللي طالبان فعاليت قيله دي.

بو حادثه لر افغانستان جمهور رييسليك سيلاولري نينگ ايككينچي دور عرفه سيده صادر ايتيلماقده. مملكت خوفسيزليك كوچلري سونگي هفته لرده شهرلرنينگ كيريب چيقيش دروازه لريده خوفسيزليك چاره تدبيرلرني كوچه يتيرگن.

افغانستان جمهور رييسليك سيلاوي نينگ ايككينچي دوري باشقه 20 كون دن سونگ اوتكزيليشي ممكن، سيلاو مستقل كميسيوني سيلاولر جريانيده خوفسيزليك يامانلنيشي ممكنليگي دن تشويش بيلديرماقده.