اوباما كيله جك جمهور رييس بيلن خوفسيزليك بيتيم ني امضالشگه اميدوار

Image copyright AFP

كوتيلمه گن بير سفر بيلن افغانستان گه كيلگن اوباما بگرام ده گي امريكاليك كوچلر بيلن اوچره شدي. او بو اوچره شووده امريكا كوچلری افغانستان ده گي ماموريتي ني نظارت ايتيش اوچون سفر قيلگنيني تاكيدله دي. اوباما بو سفريده افغان رسميلري بيلن اوچره شمسليگي ني ايتدي.

آق اوی نينگ اوباما سفري حقيده نشر ايتگن بياناتيده، اونينگ بو سفرده افغانستان جمهوررييسي بيلن ملاقات اوتكزمسليگي نظرده توتيلگني قيد ايتيلگن.

او اوباما بگرام دن توريب جمهور رييس كرزي ني آلديگه چقيرگن، ليكن كرزي بگرام گه باريشدن باش تارتگن. بياناتده اوباما كيله سي كونلرده افغان همكسبي بيلن تيلفون آرقه لي صحبت قيليشي ممكنليگي معلوم قيلينگن.

اما افغانستان جمهور رييسي حامدكرزي نشر ايتگن بير بياناتده، اونينگ دولتي اوباما ني رسمي روشده سرايده ملاقاتگه قبول قيله دي، اما براك اوباما سرايگه باش اورمه ي وطنيگه قيتگني ايضاحلنگن.

باراك اوباما بو سفريده مينگلرچه كيلومتر اوزاق مسافه ده جايلشگن عسكرلري نينگ كورسته ياتگن خذمتلريدن تشكر قيلگن.

اونگه كوره امريكاليك عسكرلر ييل آخريگه قدر افغانستان ني ترك ايته دي و افغانلر اوزلري مملكتلري خوفسيزليگي ني تامينلشيني قوللريگه آليشه دي." بيز القاعده رهبرلريني افغانستاندن سوريب چيقه ريب، قبيله لر منطقه لريگه قاچيرديك. بو توغريده قطار معمالرني باشدن كيچيرديك، حاضر افغانلر اوز كيله جكلريگه اميدوار" ، دييدي اوباما.

جمهور رييس اوباما اوز مملكتي عسكلري فعاليتيني آلقيشلب، بوليب اوتگن جمهور رييسليك سيلاولريده اهلي خوفسيزليگي تامينلنيب، آدملر آواز بيريشدي ديدي.

او ينگي جمهور رييس سيله نيب قسم ياد مراسمي دن سونگ، او بيلن خوفسيزليك بيتيم ني امضالشي باره سيده اميد بيلديرگن.

اشرف غني احمدزي و عبدالله عبدالله ايكله نامزد غلبه قازانگن پيت بيتيم گه قول قويشلري ني وعده قيلگن.

اوباما جنابلري افغانستان تيلفون علاقه لري امريكا دولتي تمانيدن ايشيتيلگني باره سيده مملكت كابينه سي بو توغريده قرار آله ياتگن بيرچاغده، افغانستان گه سفر قيلگن.