افغانستان سيلاوي نينگ ايككينچي دوري لفظي تارتيشوولربيلن

اشرف غني احمدزي نينگ طرفدارلري رقيبلريني اوتگن اوچ دهه ده گي اوروش وجنايتلرده عيبله ماقده. جمهور رييسليك ايككينچي دور سيلاولري نينگ ترغيبات كمپاينلري لفظي تارتيشوو و تنقيدلر بيلن بيرگه باشلندي.ايككله نامزد عبدالله عبدالله و اشرف غني احمدزي بير بيراولريگه سيم تاقيب، كنايه لي سوزلرني ايتيشدي. اما سيلاو نينگ ايككينچي دورگه كيتيشي معلوم قيلنگني آرتيدن، بو تارتيشوولر ينه ده كوچه يدي.بو ايكله نامزدنينگ طرفدارلري عاموي اخبارات واسطه لري و اجتماعي ترماغلرده بيراولريني قلابليك، شخصيتي، لايحه لري و آلدينگي سياسي اورينلري ني سلبي كورستيب، جنجل قيليشماقده لر.عبدالله عبدالله اشرف غني ني قلابليك قيلگنليكده عيبله ماقده، اما اشرف غني ايسه اونينگ طرفدارلري كينگ پيمانه ساخته كارليك عملگه آشيرگني ني ادعا قيليشگن.بو جريانده بعضي شخصيتلر بو ايكله نامزدني حمايه ايتيشلريني اعلان قيليشدي. گل آغا شيرزي عبدالله عبدالله ني حمايه قيلدي.

شونينگ ديك، صبغت الله مجددي بير استخاره بيلن اشرف غني ني حمايه قيليشيني بيلديردي.اونينگ استخاره سي عبدالله عبدالله تمانيدن فال ديب اتلدي.بو جريانده عبدالله نينگ ايكله معاوني اشرف غني ني عصبي و يامان خلق ديب توصيفله گن.اما اشرف غني عبدالله عبدالله نينگ يوريتگن سوزلريني اورين سيز ديب، بو سوزلر دن قان ايدي كيله دي ديب آگاه لنتيرگن.

او شونينگ ديك، اونينگ طرفدارلريدن بيرقطاري فاسد ديه عيبله گن.عبدالله عبدالله نينگ طرفدارلري اشرف غني و اونينگ معاونلري ني تينگ سيز ديب اته گنلر. اشرف غني عبدالله ني سابق كمونستلرني اوزيگه يارآلگنليكده عيبلب، بلخ حاكيمي عطامحمد نور ني تنقيد قيلگن.اشرف غني احمدزي هردايم تلويزيوني مناظره لر باره سيده تاكيدله گن، اما عبدالله ايسه اوني هزل ديب توشينگن.عبدالله جنابلري آلدينگي مناظره لردن بيريده اشتراك ايتمه گني دن سونگ، اشرف غني اوني ضعيف ديه خطاب قيلدي.

نهايت غني جنابلري اسلام تاريخي و اسلامي موضوعلر باره سيده مناظره قيليشگه تيار ايكني ني اعلان قيلدي. اما عبدالله جنابلري اونينگ تكليفي ني مزه سيز هزل ايكنيني ايتگن. نامزدلرنينگ بير بيراولريگه و طرفدارلري نينگ لفظي تارتيشوولري كون سين آشماقده. اما اهالي بولرنينگ بو حركتلريني خوش قرشيله مسليگيني بيلديريشگن. اهالي كيله جك جمهور رييسلريني كوتيب توريشگن، اما كيله جك جمهور رييس قنده ي بير شخصيت بيلن صحنه گه كيليشي معلوم ايمس.