حامدکرزی پاکستان دن راکت هجوملری توخته تیلیشی نی طلب قیلدی

Image copyright AP

افغانستان جمهوررییسی حامدکرزی باکستان باش وزیری نوازشریف بیلن تیلفونی صحبتیده پاکستان توپراغی آرقه لی افغانستان نینگ ایریم حدودلری راکت بیلن نشانگه الینه یاتگنی توخته تیلیشینی طلب قیلگن.

جمهوررییس کرزی کونیکیچه نوازشریف بیلن تیلفونی صحبتیده شوندی طلب بیلن چیققن.

جمهوررییسلیک سرای تامانیدن ترقه تیلگن خبرنامه ده یازیلیشیچه :" شریف جنابلری بوموضوع نی تیگیشلی اداره لر بیلن اورته گه قوییش وجدی حرکت قیلیشیگه ایشانچ بیلدیرگن."

افغانستان شرقیده جایلشگن کنر ولایت مقاملری گه کوره، اوتگن بیرنیچه کون جریانیده یتتی یوزدن ارتیق راکت اوقی افغانستان چیگره حدودلریگه کیلیب توشگن.

کنر ولایتی نینگ پلیس باشلیغی عبدالحبیب سیدخیل نینگ ایتیشیچه پاکستان نینگ راکت هجومی نتیجه سیده اوشبو ولایت نینگ شیگل و دانگام تومنلریده کمیده 27 نفر یره لنیب و بیر نفر هم هلاک بولگن. همده او، قریب یوز عایله اوز اوی جایلرینی ترک ایتشگه مجبور بولگنینی معلوم قیلگن.

اوتگن کون افغانستان تشقی ایشلر وزیری پاکستان نینگ افغانستانده گی ایلچیسی ابرار حسین نی جواب بیریش اوچون اوشبو وزیرلیککه چقیرگن ایدی.

کنر پاکستان بیلن چیگره داش بولیب ایریم حدودلریده طالبان عصیانچیلری فعال بولگن.

افغانستان تشقی ایشلر وزیرلیگی تامانیدن نشر ایتیلگن خبرنامه ده اوشبو وزیرلیک اورین باسری ارشاد احمدی پاکستان توپراغی ارقه لی افغانستان چیگره حدودلری راکتی هجومگه توتیله یاگنینی قتیق قاره له گن .

همده او، بوکبی حالت لر ایککی دولت اره سیده گی علاقه لرگه منفی تاثیر قالدیریشینی ایتگن.

ایککی ییلدن بیری افغان مقاملری شرقی ولایت لرنینگ ایریم منطقه لری پاکستان توپراغی ارقه لی راکتی هجومگه توتیله یاتگنینی قتیق قاره لب کیلماقده.لیکن کورنیشچه بو معما حاضرگه قدرهم حل بولمه گن.