سیاره صمدی: سیوگینگنی دیب آشیانه دن -ایریلدیم سینی تیلب آب و دانه ایریلدیم

Image copyright bbc uzbek
Image caption سیاره صمدی

داکتر عبدالستار قیزی سیاره صمدی میلادی 1991 ییلیده فاریاب ولایتی نینگ اندخوی اولوسواللیگیده تولد تاپگن. باشلنغیچ و اورته دور تعلیماتینی مزارشریف نینگ تجربوی لیسه‌سیده بیتیريب، 2009 ییلده اوزبیک تیل و ادبیاتی بولیمیگه اوقیشگه کیریب، بولیم بیرینچی‌لیگی بیلن فراغت سندینی قولگه کیریتگن. حاضر ايسه، یوکسک لیسانس قیلیش اوچون توركيه نينگ انقره شهريده بیلیم آلماقده.

شعر يازيشني مشق قيله ياتگنيگه دييرلي بير يريم ييلدن آشماقده. شعرلريدن نمونه تورك يازووچي سي رضوان اوزتورك نينگ "كونيميز افغانستانلي اوزبيك شاعرلري" ناميده گي تذكره سيده و دكتور شفيقه يارقين نينگ "يولدوزلر ايزيدن" آتيده گي تذكره سيدن باسيمدن چيقدي.

اونينگ شعرلريدن:

او مینگه باققنیده، ایرتگیم آغاز ایتردیم

ترنم کویلریده سیوگی دن بیر ساز ایتردیم

چمن ده‌ی آچیلیب، شبّاده قویینیده

کوزیمنی بیرته گل اوتروسیده مین باز ایتردیم

غزل آغوشیده هر تون خیالینگ مجلسیده

اوزیم بیرله دلیم ده سوزله‌شیب، کوپ راز ایتردیم

زیارت، یوق، قچان مین زر طلب قیلدیم

اوشل پیت‌لر عزیزیم نامینگگه هم ناز ایتردیم

کوزینگ نینگ مردمی ده‌ی کونلریم تیره

قرانغو تونده خاطرینگ‌گه پرواز ایتردیم

که سیندن سیس ایشیتمه‌ی هم نه بیر سوز

ولی حق ‌سیز سینی همراز ایتردیم

**

آلتین اوی بیزگه یسر تیمیر بغیر پادشاهلر

سیوگی نوری بهانه، گاها ساوغه آلاولر

صداقتدن گپیریب، ساتیب بولدی غنیمگه

سایه‌ء سَرلر نخات ایلندی سیاه‌سرگه

کوزده‌گی سرمه رنگی، ضمیریده‌گی قیغو

حقیمیز بیر دیگنی، توقمه افسانه-کو بو!

ظلمتلر قوچاغیده، یالغان ایرک اسیره‌سی

بولدی بلند همّتینگ اسارت وسیله‌سی

شیویرلسه گر سیوگی، نیگیزدن قوریترلر

عنعنه‌گه باغلیق کو بختی قاره عیاللر

افغانلر ملکی دییه، غروری بلند وطن

باق! قنده‌ی ینچدی سینی باکره گوزه‌ل چمن

شونینگ اوچون بیزه‌کلر مېنگه معنا تاشیمس

رنجیمه آنه وطن، خطا، گناه سینده‌مس

لِیمّا- لیم سیوگی بیلن اعزازله‌دینگ فرزندینگ

قیزلرینگنی کویدیردی منه ‌شو جگربندینگ

یوزینگده‌گی اجین‌لر هر بیری اون حکایه

قلتیره‌گن نازک قول، غملرینگدن نشانه

ایزیلمه‌ آنه‌گینم، بختینگ کولر البتّه

قنی ایندی بیزنی دیب تبسم قیلگین شرتّه

**

سیوگینگنی دیب آشیانه دن ایریلدیم

سینی تیلب آب و دانه ایریلدیم

بو دهر ایلی سین طفیلی ترک ایتدی مینی

کور، کیم سینی دیب زمانه‌دن ایریلدیم

**

خداوند سوزلریمنی سینگه ایتدی

کلامیم عفتینی سینگه بیتدی

ایشانچیم سینگه باغلیق روزگاردن

بوتون آرزولریم اوزینگگه قیتدی

**

سيز خواطيرلنمنگ،

بيزده گي برداش،

خيانت لرينگيز عطريني آچمه يدي.

دردلرني قلمگه آليش،

جبر قدر قيين و امّا؛

اديرلر اوز كونيده ساوغه بوله دي سيزگه.

تاووشيميز،

عداوت ني مومگه ايلنتيره دي،

نيگه كه،

تينچليككه بولگن،

سيوگيميز قويوق.

**

سينگه مينينگ،

خاطره مدن اوزگه نرسه قالمه يدي.

كوزلريمده گي ياروغليكني،

بغريگه باسه دي توپراق.

قوللريم قوچاغينگدن ايمس،

قارانغوليكدن توله دي.

قوشلرنينگ قوشيقلري،

تابوتيم اوستيگه ساچيلگن آق كيلينليك كييميم ني،

الوان محزونليككه بوركه يدي.

انه او يوكسكلرده؛

ميندن زياده،

بولوت لر سينگه آچه دي سايه بان،

سينگه سايه قيله دي درخت،

بوغزينگدن ملايم اوته دي نان،

نفسلريمني هيده گن اوشه خانه،

سينگه اتيگي بيرته خاطره دفتري ساوغه قيله دي.

قيد قيلينگن ساووق نفسلريم اونده،

اوتديك يانگن يوره گيمني،

مينينگ عيال حسلريمني،

غريب كوليشلريم سيرّيني،

بيلديره دي بيرته معصوم سوز بيلن:

"كيته من كوكلميم،

قدريمگه ييتيشينگ اوچون