دکتر عبدالله سوقصد دن امان قوتیلدی

Image copyright AP

افغانستان جمهور ریس لیک نامزادی دکتر عبدالله عبدالله بوکون بیر سوقصد دن ساغ امان قوتیلدی . توش چاغیده عبدالله جناب لری اوز اورین باسر لری همده بیر قطار طرفدار لری بیلن کابل شمال غربی منطقه سیده سیلاو الدی کمپاین دن چقیب باشقه بیر مراسم ده باریش چاغی ده بو خود کش هجوم بیلن یوز مه یوز بولدی . افغانستان ایچکی ایش لر وزیر لیگی ترقتکن خبرنامه ده ایتیلیشیچه ، خود کش هجومچی شخص پارتلوچی ماده اورنتیلگن نقلیه واسطه سی نی عبدالله جناب لرینی بدرقه قلاتکان کاروان یقینی ده پارتلتکن. خبرنامه ده یازیلیشیچه بو هجوم ده عبدالله جناب لریگه قندای بیر صدمه یتکزیلمگن اما اونی نقلیه واسطه سی بوتکل اورتدن کتکن. ایچکی ایش لر وزیر لیگی بو حادثه ده عادی اهالی دن آلتی کیشی قربان بولگنی و ایگرمه ایککی کیشی جراحت کورگنی نی ایتکن. عبدالله جناب لری حادثه دن سونگ اخبارات واسطه لردن دن جان لی چیقیشیب قورقچی لریدن بیری بو حادثه ده جراحت کورگنی نی بلدیرگن. او بو حادثه افغانستان خلقی یاولری تمانیدن عمل گه آشیریلگنی نی تاکیدلگن. حاضرگه قدر هیچ بیر گروه یا شخص حادثه مسولیتی نی اوز بوینیگه آلمگن . افغانستان جمهور ریس حامد کرزی دکتر عبدالله عبدالله قرشی اویشتریلگن خودکش هجوم نی قتیغ قاره لب افغانستان خلقی دشمن لری هیچ قچان بو ملت تینچ فضا ده کله سی جمهورریس لرینی تن لش نی استه می دیلر دیب تاکیدلگن . عین دمدمه جمهور ریس لیک نامزاد و عبدالله جناب لری نینگ یگانه رقیبی دکتر اشرف غنی احمدزی هم بو حادثه نی قتیغ قارلگن .

سکیز کون دن سونگ جمهور ریس لیک سیلاوی ایککنچی دوری اوتکزیلماقچی . .