طالبان نينگ قوييب يوباريلگن بيش اعضاسي نامعلوم جايگه اوتكزيلگن

Image copyright BBC World Service

بولر طالبان گروهي نينگ اينگ يوقاري مرتبه لي اعضلريدن بولگن.بي بي سي قولگه كيريتگن معلوماتلرگه كوره، امريكاليك عسكر عوضيگه قوييب يوباريلگن طالبان بيش اعضاسي دوحه شهري نينگ عاموي نظردن اوزاق منطقه سيگه آليب كيتيلگن.

بو بيش كيشي، بوندن قريب 13 ييل گوانتانامو تورمه سيده قماق جزاسيني اوتب، اوتگن هفته امريكا و طالبان گروهي رسميلري اورته سيده عملگه آشيريلگن بير كيليشووده آزاد ايتيليب، قطر دولتيگه تاپشيريلدي.

طالبان بو بيش اعضاسي بو گروه نينگ افغانستانده سورگن حاكميتي دوريده، بو رژيم نينگ اينگ يوقاري ملازملريدن بولگن.

مذكور شخصلرگه يقين منبع لرنينگ بي بي سيگه معلوم قيليشيچه، اوزاق ييللر قماق جزاسيني اوته گن بو شخصلر روحي و جسماني قيناقلر كورگني سبب، عاموي اخبارات واسطه لري حضوريده چيقيش قيليشگه قادر ايمسلر.

امريكا و قطر رسميلري، آزاد ايتيلگن طالبان اعضالري ينه بير ييلگچه قطردن چيقه آلمسليگي و شو مدت ايچيده نظارت آستيده بوليشي ممكنليگي ني ايتيشگن.

اما ديپلماتيك بيرنيچه منبع لر، كيله سي ييلده اولرنينگ قطرني ترك ايتمه گونچه، باريب ـ قيتيشلريگه چيك قويمسليگي ني معلوم قيليشگن.

امريكاليك رسميلر هم قطر اولرگه مذكور محبوسلر قوييب يوباريلگني دن سونگ، تهديدلرني توغديرمسليككه ايشانچ بيلديرگني ني ايتيشگن.

اما امريكا ان بي سي ترماغي اوتگن كون طالبان قوماندانلريدن بيري نينگ تيليدن خبر بيريشيچه، آزاد ايتيلگن طالبان دن بيري نورالله نوري نينگ دوستلريدن بيريگه افغانستان گه قيتيب، امريكاليك عسكرلرگه قرشي جنگ قيليشيني ايتگن.

نوري جنابلري نينگ يقينلريدن بيري هم اونينگ بو سوزلريني تصديقله گن.

نوري طالبان حاكميتي دوريده استخبارات اداره سي معاوني صفتيده وظيفه بجرردي.

بو بيش طالب نينگ آزاد ايتيلگني امريكا ده بيرقطار سياستچيلر وافغانستان دولتي نينگ قتيق اعتراضيگه سبب بولگن.

افغانستان تشقي ايشلروزيري مذكور محبوسلرنينگ آزاد ايتيلگني دن آرتيدن، بير اعلاميه نشر ايتيب، اولرنينگ آزادليگي ني افغانستان دولتي خوش قرشيله يدي ديگندي. اگر اولر هم نظارت آستيده قاله ياتگن حالده، اونگه اعتراض بيلديريشيني معلوم قيلگن.

بويي برگدال امريكا نينگ افغانستانده گي اوروشيده طالبان قوليگه اسير بولگن يگانه عسكري. او اوتگن هفته بيش ييل اسارت دن سونگ، آزاد ايتيليب، شفاخانه ده ياتقيزيلدي.