عبدالله: سیلاو کمیسیونی دارالانشا رییسی وقتینچه لیک وظیفه سیدن آلینیشی کیره ک

ایککینچی دور سیلاو نامزدی عبدالله عبدالله مستقل سیلاو کمیسیون دارالانشا رییسی ضیاالحق امرخیل نینگ وقتینچه لیک وظیفه سیدن آلینیشی نی طلب قیلدی. عبدالله عبدالله، امرخیل نینگ قلاب لیکده عیبلگنینی ایتدی.

عین حالده، عبدالله جنابلری بوخصوصده تحقیقات اوتکزیلیشینی طلب قیلگن. کابل پلیس قوماندانی سیلاو کونیده سیلاوگه عاید کیره کلی ماده لر یوکلنگن ایککی نقلیه واسطه نی پلیس نینگ خبرسیزلیگیده نامعلوم جایلرگه کیته یاتگن بیرچاغده، توخته تیلگنینی ایتگن ایدی.

کابل پلیس باشلیغی محمد ظاهر ظاهر، کمیسیون دارالانشا رییسی کیره کلی ماده لردن فایده لنیب، انیق نامزد منفعتیگه استعمال قیلیش نیتیده ایکنینی ادعا قیلگن.

امرخیل جنابلری بو ادعا لرنی رد ایتیب، کیره کلی ماده لر سروبی تومنیگه انتقال بیریلیشیگه پلیس توسیق بولگنینی اورغوله دی. عین حالده او، پلیس نینگ بو عملینی ناقانونی بیلیب، تحقیقات اوتکزیلیشینی طلب قیلدی.

شونینگ دیک، داکتر عبدالله عبدالله، ایککینچی دور سیلاو ده کینگ قلاب کارلیک لر یوزبیرگنینی تیلگه آلیب، صندوقلر تولدیریلگنی باره سیده هم گزارشلر موجود لیگینی معلوم قیلدی. همده او سیلاو ده یتتی میلیون دن آرتیق شخص اشتراک ایتگنینی هم رد ایتدی. شونگه علاوه، عبدالله عبدالله بعضی بیر محللرگه کمیسیون کوزه تووچیلر کیریب باریشگه ایزین بیریلمه گنینی اورغولب، نظارتچیلریدن ایریم لری کلتک له نیب حتی قماقق آلینگنینی ادعا قیلدی.

افغانستان ایچکی ایشلر وزیری عمر داوود زی، امرخیل و پلیس قوماندانی آره سیده پیدا بولگن جنجل نی توشینماوچیلیک دیه فکر بیلدیردی:" یوزبیرگن توشینماوچیلیک نی برطرف ایتیش اوچون بیر هیات تعیین ایتیلگن." دییدی، ایچکی ایشلروزیری.