عراق انقراضی: جنگریلر بغداد بوسغه سیده

Image copyright AFP

عراقدن کیله یاتگن خبرلرگه کوره، اردو و سنی جنگریلر اورته سیده ققشتقیچ جنگلر کیتماقده.خبرلرده ایتیشیچه، بغداد دن اتیگی 60 چقریم مسافه ده جایلشگن بکوبه شهری نینگ بیر قسمی عصیانچیلر قولیگه اوتگن.بی بی سی نینگ بغداد ده گی مخبری ریچارد گلین گه کوره، دییله ولایتی نینگ پایتختی بکوبه نینگ قولگه آلینیشی جنگریلر اوچون بغدادگه باره دیگن اساسی یونه لیش نی قولگه کیریتگن حسابلنه دی.عصیانچیلر بکوبه ده بیر قنچه موزولرنی و پولیس بولیمینی اشغال قیلگنلر و قورال یراقلرنی آلگنلر.عصیانچیلر حاضر شهرنینگ قیسی قسمیده ایکنلیگی معلوم بولسه ده، اولرنینگ مقصدی بغداد گه تمان یوریش ایکنی سیر ایمس، دییدی او.

عراق نینگ ییریک موصل و تیکریت شهرلرینی ایگلله گن جنگریلر دوشنبه کونی تل اپرنی قولگه آلگنلر.

مخبریمیز عراق کوچلری استراتیژیک اهمیتگه مالک تل اپرنی قیته ریشگه حرکت قیله یاتگنی حقیده خبرلر بارلیگینی ایته دی.

اهالیسی 200 مینگ کیشی بولگن شهر موصل و سوریه چیگره سیده جایلشگن.

شونینگ دیک، انبار ولایتیده جنگریلر الفلوجه شهریده اردونینگ تیک اوچرلرینی اوریب توشیرگنلر و بیر نیچه تانکلرنی یکسان ایتگنلر. اردو کوچلری رمادی یقینیده گی حربی قرارگاه نی تشلب قاچگنلری ایتیلماقده.

عراق ده گی کردلر مختار منطقه سی باش وزیری نینگ بی بی سی گه ایتیشیچه، حاضرگی عراق بیرلیگینی سقلب قالیش جوده مرکب مسله گه ایلنگن.

عراق ده گی خارجی قونسوللیک بینالریده خوفسیزلیک چاره لری کوچه یتیریلگنلیگی نی کوزه تیش ممکن.

امریکا جمهور رییسی براک اوباما کانگریسگه عراقده گی امریکا فقرالری و بغداد ده گی ایلچیخانه نی قوریقلش اوچون 275 حربی جونه تیلیشینی معلوم قیلگن.

عین حالده، 1979 ییلده گی ایران انقلابیدن کیین توغریدن ـ توغری علاقه لری بوتکول اوزیلب قالگن امریکا هم عراق ده گی سنی جنگریلرگه قرشی کورش ده ایران بیلن ملاقات قیلیش ایسته کیده ایکنینی معلوم قیلگن.

امریکالیک رسمیلری گپ حربی همکارلیک حقیده بارمه یاتگنینی درحال بیلدیریب قویگنلر.

بیر قنچه معلوماتلرگه کوره، مذاکره لر شو هفته ده یاق باشله نیشی ممکن.

اگر شونده ی مذاکره لر باشلنه دیگن بولسه، بو ایسکی ایکی رقیب مناسبتلریده اولکن قدم بوله دی.

شونینگ دیکف بریتانیا تشقی ایشلروزیرلیگی 2011 ییلده یاپیلگن تهرانده گی بیریتانیا ایلچیخانه سی نی قیته آچیلیشنی ریجه له یاتگنی معلوم بولگن.

17 جون کونی بیریتانیا پارلمانی اعضالری قرشی سیده تشقی ایشروزیری ویلم هیگ ایران بیلن علاقه لرنی قیته تیکلش گه بغیشلنگن ریجه نی اعلان قیلیشی خبر قیلینگن.

2011 ییل بریتانیا نینگ تهرانده گی ایلچیلیگی گه بولگن هجوملردن کیین ایکی مملکت اورته سیده گی دیپلماتیک علاقه لر بوتکول توخته تیلگن ایدی.

بیراق اوتگن ییلی حسن روحانی نینگ ایران چمهور رییسی یتیب سیلنگنی همده ایران اوزی نینگ هسته یی دستورینی جلولشگه راضی بولیب، بو باره ده غرب بیلن ایکی طرفنی هم قانیقتیره دیگن کیلیشوولرگه ایریشگنی رسمی تهران بیلن مناسبتلر ایلیقلشیگه ایتکله گن.

جنگریلریگه قرشی توریش مسله سیده غرب بیلن ایران موقع لری بیر بیریدن فرق قیلمه یدی، شو باعث غرب دولتلری نینگ رسمی تهران بیلن ملاقاتلری جانلنگن.