افغانستان پارلماني معلوماتگه ايريشيش قانونيني تصديقله دي

Image copyright AP

افغانستان پارلماني بو قانون ني اكثريت آواز بيلن تصديقله دي.

دوشنبه كونگي ييغينده ملت وكيللري آلتي فصل و 32 ماده دن عبارت معلومات گه ايرشيش قانوني ني تصديقله ديلر.

بو قانون لايحه سي بوندن اوچ ييل دن بيري حكومت اداره لريده تيكشيروو آلينگندي و بوندن كميده ايكي آي آلدين پارلمان گه يوباريلگندي.

ايتيليشيچه، بو لايحه توشيح ايتيليشي اوچون سنا مجلسي و جمهور رييسليككه يوباريلگني دن سونگ، اون بيشينچي، اون آلتينچي و اون ييتينچي ماده لريگه اوزگريش كيريتيلگن.

اولوسي جرگه اعضالري هر بير جنجللي ماده لر ني آواز گه قوييب، اوچ فقره ني ايكي ماده دن آليب چيقرگن و بير فقره ني اون ييتينچي ماده ده اوزگرتيرگنلر.

معلومات ايريشيش قانوني نينگ باش لايحه سيده دولت انسان حقلري ني اياق آستي قيلينيشيگه سبب بوله ديگن معلوماتلرني عاموي قيلينمسليگي ني تكليف قيلگن ماده ني آليب چيقرگن.

قانون باش لايحه سي آلتينيچي فقره سيده حكومت نينگ دنيا دولتلري باره سيده گي فرهنگي، اجمتاعي، سياسي ، اقتصادي وباشقه مسله لرني اوزوچي خبرلرني نشر ايتمسليگي تكليفي رد ايتيلگن.

افغانستان اولوسي جرگه سي نينگ ديني و مدني كميسيوني رييسي كمالناصر اصولي نينگ بي بي سيگه ايتيشيچه، ينگي اوزگريشلرگه كوره، اولدن اون ييتينچي فقره گچه حكومت نينگ قيلگن تكليفلري اوزگرتيريلگن.

اصوليگه كوره، معلومات گه ايريشيش قانوني لايحه سي اوتگن ايكي آي ايچيده جنجللي موضوعلردن بيري بوليب، نهايت اكثريت آواز بيلن تصديقلنگن.

مجلسي اعضالري بو قانون نينگ تصديقدن اوتيشي بيلن، معلومات لر اوز وقتيده عاموي اخبارات واسطه لريگه بيريليشي باره سيده اميد بيلديرگنلر.

پارلمان رييسي عبدالرووف ابراهيمي جنجلي هر اوچ ماده ني آوازگه قوييب، هر بير پاراگراف ني اكثريت آواز بيلن رد ايتيشگني ني ايتگن.

بو قانون لايحه سي، سونگي ييللر سوزايركينليگي ني حمايه ايتووچي گروه لر دولت ني بو قانون نينگ تصديقلنيشيده بي فرق ايكنليكده عيبله ياتگن بيرچاغده تصديقلندي.

عين حالده، افغانستان ايركين مطبوعات ني حمايه ايتووچي "ني" اداره سي بو تدبيرني خوش قرشيلب، اوني افغانستان سوزايركينليگي رواجلنيشي ده كته يوتوق ديه توصيفله گن.

معلومات گه ايريشيش قانوني، دولت اداره لريني اهالي و ژورناليستلرگه معلومات بيريشگه مكلف قيله دي.