افغانستان حكومتي فيسبوككه توسيق قويمه يديگن بولدي

Image copyright PA

افغانستان ملي خوفسيزليك كينگشي فيسبوك اجتماعي ترماق صحيفه سيني ياپيش چقيريقلريتي رد ايتگن.

اولراق مملكت جمهور رييسليك سيلاولري باره سيده انترنت ده كيچه ياتگ قيزغين موضوعلر ملي عداوت قوزغته ياتگني يوزه سيدن خواطرلر ينگره گندي.

ايريملر مملكتده برقرارليك و ملي بيردمليك ني سقلش اوچون اجتماعي ترماق صحيفه لريگه چيكلاو جاري ايتيشگه چقيريشگن.

اوتگن هفته پايتخت كابلده جمهور رييسليككه نامزاد عبدالله عبدالله نينگ مينگلب طرفدارلري سيلاولرده آوازلرنينگ ساخته لشتيريلگني گمانلري باعث، جمهور رييسليك بناسي قرشي سيده ييغيليشگن.

"اشرف غني گه اوليم! سيلاو كميسيونيگه اوليم" ديب هيقيريشگن نمايشچيلر.

افغانستان ده گي جمهور رييسليك سيلاولري نينگ بيرينچي باسقيچيده 40 فايزدن كوپ آواز توپله گن عبدالله عبدالله بو گلگي آواز بيريشده اوزي نينگ ساخته آوازلرنينگ كوپه يتيريلگني قرباني بولگنيني ايتگن و سيلاو نتيجه لريني رد قيلگن.

جناب عبدالله جمهور رييس كررزي و ولايت كينگشلريني هم اشرف غني فايده سيگه ايش يوريتگنليكده عيبله گن.

اونينگ رقيبي اشرف غني احمدزي ايسه هله قچان بير ميليون آواز بيلن اوزي نينگ غلبه قازانگنيني بيلديرماقده.

عين وقتده جمهور رييس حامدكرزي ناراضيليكلرگه مناسبت بيلديريب، بونده ي چيقيشلر افغانستانگه ديموكراسي كيلگني نينگ بيلگيسي ايكنيني ايتگن.

" سرايگه اوت قويه ميز"

24 جوزاده كيچگن آواز بيريش جريانلريده گي قلابليكلر باره سيده جمهور رييسليككه نامزادلر اشرف غني و عبدالله عبدالله طرفدارلري اورته سيده گي بحث مناظره لر زوره وانليكلرگه ايله نيب كيتيشيدن خواطرلر موجود. اما يكشنبه كوني عيني مسله سيني محاكمه قيلگن افغانستان ملي خوفسيزليك كينگشي فيسبوككه توسيق قويمسليككه قرار قيلگن.

جمهور رييس كرزي نينگ سوزچيسي فايق واحديگه كوره، دولت رهبري فيسبوك ني تحقيقله مسليك، بونينگ اورنيگه ياشلرني اوندن مسووليت بيلن فايده لنيشگه چقيريش حقيده بويروق بيرگن.

فيسبوككه تحقيق قوييش احتمالي افغانستانليك فايده لنووچيلر آره سيده سراسيمه و غضبناك مناسبتلرگه سبب بولگن.

جمله دن، اولردن بعضيلري فيسبوك ياپيلسه، "افغانستان جمهور رييسي سرايي ني ياقي" بيلن تهديد ايتگنلر.