فارياب و بغلان ده تورت كيشي تورلي حادثه لرده قربان بوليشگن

فارياب ولايتي دولت آباد تومني مسووللري بو حادثه ده بير قوم آقسقالي هم پوليس تمانيدن آتيب اولديريلگنيني معلوم قيليشگن.

ايتيليشيچه، مذكور قوم آقسقالي پوليس تمانيدن ريكشا موتريده پارتلاوچي ماين جايلشتيريلگني گمان قيلينيب، تيكشيريله ياتگن بيرچاغده، پوليس گه هجوم قيلگن پيت آتيب اولديريلگن.

مسووللرگه كوره، مذكور پوليس حبسگه آلينگن وقضه اوستيدن تحقيقات باشلنگن.

عين بو ولايت نينگ خواجه سبزپوش تومنيده باشقه بير كيشي نامعلوم شخصلر طرفيدن قتل قيلينگني باره سيده خبر قيلينگن.

خواجه سبزپوش تومني حاكمي 40 يشر ميراكبر عايله وي دشمنليگ سبب اولديريلگنيني معلوم قيلگن.

اونگه كوره، مذكور شخص طالبان حاكميتي دوريده اوز خانميني شفقت سيزليك بيلن قتل ايتگن و ايرانگه قاچيب كيتگن، شو مسله سبب خاتيني نينگ عايله سي اوني اولديريلگنليگي ممكن.

عين حالده، فارياب نينگ اندخوي تومنيده هم بير ياش ييگيت اوزيني آسيب اولديرگني ايتيله دي. محل مسووللري نينگ ايتيشيچه، مذكور ييگيت نينگ عايله سي اونينگ خبرسيزليگيده مهمانليككه كيتگن بير چاغده، او اوزيني آسيب اولديرگن.

او بوندن سكيز آي تورموش قوريب، عصبي و روحي كسلليككه هم چلينگنليگي ايتيله دي.

اما معلوماتلرگه كوره، او كمبغلليك و نادارليككه چيده ب توره آلمه ي، خودكشليككه قول اورگن.

باشقه بيرخبرگه قره گنده، بغلان ولايتي ده هم ايكي ياش ييگيت قتل ايتيلگن. بغلان خوفسيزليك مسووللري بو ايكي ايناغه اوز تاغه سي تمانيدن جلگه تومنيده اولديريلگنيني معلوم قيلگن.

پوليس اولرنينگ تاغه سيني قولگه آلگن.

پوليس گه كوره، قولگه آلينگنلر اوز گناهيگه اعتراف ايتيب، جي ينلريني بوندن اون ايكي ييل مقدم ايكي عايله اعضالريني اولديرگنليك سبب، اولرني اولديرگنيني ايتگنلر.