ملت وكيللري نينگ امتيازلر قانون لايحه سي ولايتلرده اعتراضلرگه سبب بولدي

افغانستان پارلمان اعضالري نينگ اوزلريگه خاص امتيازلر قانون لايحه سيني تصديقلگني، مملكت بيرقطار شهرلريده مدني جماعه چيليك اعضالري نينگ قرشيليگيگه رو په ره بولگن.

بوگون شمالي مزارشريف، هرات و جوزجان ولايتلريده مدني جماعه چيليك فعاللري مذكور قانون گه قرشي اعتراض بيلديريب، اوني افغانستان خلقي منفعتلريگه ضد ايكنيني تاكيدله گنلر.

بلخ ولايتي اونلب مدني جماعه چيليك فعاللري ولايت كينگش بناسي قرشي سيده اعتراض بيلديردي. اعتراضچيلر قوللريده قيزيل قاغازلرني كوته ريب، وكيللرگه امتياز بيرووچي قانون ني قاره لشدي.

نجيب الله پيكان بلخ ولايتي مدني فعال اعضالريدن:”بيز قانونگه، منطقگه و ملي عرف عادتلريميزگه قرشي هر قنده ي امتياز طلبليكلرگه قرشي ميز. قيزيل قاغازلرني كورستيب، قرشيليگيميز بيلديره ميز. حكومت، و اوزلري بيزنينگ نماينده لريميز صفتيده كوره ياتگن وكيللر بونگه قرشيليك بيلديرمه گونچه، بو اعتراضلريميز دوام ايتديريله دي”.

ملت وكيللريگه كته امتياز بيرووچي قانون لايحه سي گه قرشي اعتراضلر بوگون هرات و جوزجان ولايتلريده هم يولگه قويلدي. اما هراتده اعتراضچيلر اوز اعتراضلريني پارلمان اعضالريگه قرشي شعار بيلن باشلشدي.

بو ولايت يوزلب عيال و ايركك مدني جماعه چيليك فعاللري كوچه گه چيقيب، بو قانونگه قرشي اعتراض بيلديريشدي.

هرات مدني فعاللريدن بيري غلام سخي مجروح مذكور قانون ني افغانستان خلقي منفعتيگه قرشي ديه تاكيدله دي:”بيز پارلمانده وكيللر گه امتيار بيرووچي قانون خلق منفعتلريگه قرشي ايكني باره سيده اعتراض بيلديرماقده. خلق بير لقمه نان گه محتاج، وكيللرگه بو مقدار پول و قوريقچيني قه يردن قيله دي. بو قانون بير بيمه شركتي ني وجودگه كيلتيره دي و افغانستان خلقي منفعتيگه قرشي دير. بيز سنا مجلسي و افغانستان جمهور رييسيدن بو قانون ني تصديقله مسليگي ني جدي سوره ي ميز”.

بو اعتراضلي ييغينده مدني فعاللردن تشقري ناگيرانلر و شهيدلر عايله اعضالري اشتراك ايتيب، ملت وكيللري نينگ بو حركتي ني قتيق قاره لب، جمهور رييس دن بو قانون ني امضالمسليگي ني طلب قيليشدي.

اما جوزجان ده بيلديريلگن اعتراض ده 20 دن آرتيق مدني فعال اشتراك ايتيب، وكيللرگه بيريله ديگن 25 فايز امتياز گه يوق دييشدي.

بو قانون تورت فصل و 20 ماده دن عبارت. اونده وکیللر وظیفه سی يكونلنگني دن سونگ، اولرنينگ هر بيريگه مخصوص امتیاز جمله دن 25 فایز معاش، ایکی قوریقچی و سیاسی پاسپورتلری سقله نیشی قيد ايتيلگن.

پارلمان اعضالری نینگ سونگی ايستك خواهشلري حتی اجمتاعی ترماقلرده هم اعتراض و عکس العمللرگه سبب بولگن.