افغانستان : پاکستان حقانی ترماق اعضالری نی تینچ مکانگه انتقال بیرگن

Image copyright Reuters

افغانستان ملی امنیت اداره سی بوگون کابلده اوتکزگن مطبوعات انجمنیده پاکستان نینگ شمالی وزیرستان مینطقه سیده یولگه قوییلگن حربی عملیات نی قتیق قاره لب تروریستی گروه لرنی یوق ایتیش اوچون هیچ قندی تاثیر قوییمه گنینی ایتدی.

افغانستان ملی امنیت اداره سی سوزچیسی حسیب صدیقی، اینگ مهم تروریستی حقانی ترماغی بو عملیات دن امان قالگنینی ایتدی:" معلومات لرگه کوره، پاکستان استخبارات اداره سی نینگ بویوروغی اساسیده حربی عملیات دن ایککی هفته آلدین حقانی ترماغی نینگ مهم اعضالری بیرقنچه قورال اسلحه بیلن 150 نقلیه واسطه ارقه میرانشاه شهریدن تل شهری و اوییردن کرم انجنسی منقطه سیگه انتقال بیریلگن."

شونینگدیک او، لشکر طیبه حافظ گلبهار باشلیغیده گی تروریست گروه لر هم هیچ قندی زیان کورمه گنینی ایتیب پاکستان نینگ حربی عملیاتی عصیانچی گروه لر گه تلفات قالدیرمه گنینی تیلگه آلدی.

عینی حالده نازک بیرمرحله ده پاکستان استخبارات اداره سی نینگ یاردمی بیلن حقانی ترماغی پکتیکا ولایتی نینگ ارگون تومنیده تروریستی هجومنی اویوشتیردی دیب ایتدی صدیقی جنابلری. مذکور تومنده یوزبیرگن انتحاری هجومده کمیده 89 نفر قربان بولدی.

بوندن بیرنیچه کون آلدین خارجی کوچلرنینگ افغانستانده گی عمومی قوماندانی ژنرال دنفورد امریکا کنگریسیده پاکستانده یولگه قوییلگن حربی عملیات دن ناراضیلیک بیلدیرگن ایدی. او بو عملیات حقانی ترماغی فعالیتی گه هیچ قندی تاثیری قالدیرمه گنینی ایتگن ایدی.

ینگی امنیتی چاره تدبیر

اوتگن هفته قورال بیلن جهازلنگن عصیانچیلر یریم ایشلنگن بنا لردن بیرگه کیریب کابل هوا قونالغاسینی نشانگه آلدیلر، همده بو قونالغا انده سنده راکت هجوملری بیلن هم نشانگه الینه دی. صدیقی جنابلری کابل هوا قونالغاسی امنیتی نی تامین لش اوچون ینگی چاره تدبیر قول اوستیگه الیگنیدن خبربیردی:" قیسی منطقه لردن هوا قونالغاسی نشانگه الینیشی نی انیق لش وبوکبی حالت لر الدی آلینی شی اوچون ملی امنیت اداره سی ، مدافعه و ایچکی ایشلر وزیرلیک لری تامانیدن هیات تعین ایتیلگن."