مزارشریف ده اونلب ایشلب چیقه روچی فابریکه فعالیتگه باشله گن

اوتگن اون ايكي ييل مابينيده مزارشريفده اونلب ايشلب چيقه روچي فابريكه وشرکت لر قوریلگن. اولر ایشلب چیقرگن توار اشیالر بازارگه چیققن.

بو فابریکه لر کته سرمایه بیلن تاسیس ایتیلگن. بولردن بیری ایاق کییم ایشلب چیقه رووچی فابریکه. فابریکه رییسی مظهرالدین امیری سابق پلاستیک اشیالر و ایدیشلر پاكستان دن وارد قيلينردي، اما حاضر كميده 90 فايز وطنده ايشلب چيقه ریله یاتگنینی ایته دی.

اونگه کوره، پاكستاندن اون فايز اشیا وارد قيلينيشي ممكن، اما اولر چين و پاكستانده ايشلب چيقه رووچي ماشينلرنی وارد قیلیشگن. اولر پاكستانگه رقابت قيلیشلری ممکن.

اما بو تدبیرکارلر چین کمیده اوتیز فایز پلاستیکی اشیالر وارد قیلینه یاتگنی، اولرنینگ سرمایه یاتقیزیشلریگه ضربه اوره یاتگنی دن تشویشده. شونگه قره مسدن، ایشلری رواجنلیب باره یاتگنیدن خرسندلر.

Image caption تدبیرکارلر چین کمیده اوتیز فایز پلاستیکی اشیالر وارد قیلینه یاتگنی، اولرنینگ سرمایه یاتقیزیشلریگه ضربه اوره یاتگنی دن تشویشده. شونگه قره مسدن، ایشلری رواجنلیب باره یاتگنیدن خرسندلر.

اما بوندن توقيز ييل مقدم اون مينگ دالر سرمايه بيلن اساس قوييلگن باشقه بير پايبزال و آفتابه ايديش ايشلب چيقه رووچي كوهدامن اسملي فابريكه مسوولي سميع الله ، كته مقدار ده ايشلب چيقه رووچي ماشينلر موجود، اما مشتري و خريدار يوقليگي دن شكايت قيله دي:"پاكستان، ايران و چين مملكتلريدن كته مقدارده شو اشيالر وارد قيلينه دي، شو خره جتي كه بيز صرفله يميز، انه شو خره جتده او تماندن وارد قيلينه دي. شو سببدن بيز فايده قولگه كيريته آلمه ديك، خادملريميز و قولگه كيله ديگن مبلغ ني فابريكه كمچيليكلريگه صرفله ي ميز. اونچه فايده سي يوق".

بو فابريكه لرده عمومآ مصله ياغ ايديشلر و كهنه پايبزاللري قيته ايريتيليب، كاووش و ايديش قيليب چيقه ريله دي.

اما فابريكه مسووللري و خادملر اكثرآ ايشلري رواجلنمه ي قاله ياتگنيگه، افغانستان جمهور رييسليك سيلاولري نتيجه سي معلوم بولمه ياتگني ني سبب قيليب كورستماقده لر.

بونگه ايكي ميليون دالردن آرتيق سرمايه ياتقيزيلگن. ماشينلري زمانوي عمومآ چين مملكتيدن وارد قلينگن. اوتگن آلتي ييل مابينيده كته مبلغ فايده قولگه كيريتگن. ميرويس ولي زاده حسابات اداره مسوولي.

اما شونگه قره مسدن بو فابريكه ده هر كوني 150 درجن تورلي خيل پايبزال ايشلب چيقه ريله دي. خادملر ايسه، عيال وايركك اياق كييملريني مخصوص جايده بويب، كارتن قيليشماقده لر.

Image caption اما فابريكه مسووللري و خادملر اكثرآ ايشلري رواجلنمه ي قاله ياتگنيگه، افغانستان جمهور رييسليك سيلاولري نتيجه سي معلوم بولمه ياتگني ني سبب قيليب كورستماقده لر.

اما پیبزال و پلاستیکی اشیالرنی ایشلب چیقه رووچی ماشینلردن تشقری روب و رنگ ایشلب چیقه رووچی فابریکه لر یخشی رواجلنگن و فایده قولگه کیریتگن.

الجمیل روب و رنگ ایشلب چیقه رووچی فابریکه حسابات اداره سی رییسی میرویس ولی زاده:"ساتيشيميزگه قره گنده بعضي ييللر 500 مينگ دالر، اوچ يوز مينگ دالر و تورت يوز مينگ دالر فايده قولگه كيريته ميز. ليكن هردايم افغاني پولگه ساته ميز، اما آليشيميز دالر بيلن بوله دي. ييليگه 60 ـ الي 70 مينگ كارتن رنگ ايشلب چيقه ره ميز. هر ييلي جمعآ 70 مينگ كارتن رنگ ايشلب چيقه ريشگه قادر ميز، دییدی.

بو فابريكه ده 50 دن آرتيق آدم كارگر صفتيده ايشلشه دي. بولردن اكثريتي ني عياللر تشكيل بيره دي.

بو ييرده عياللرگه قره گنده، ايرككلر آغيرراق ايشلرني بجره ديلر. اولر بيرل لرده تورلي خيل رنگ ماده لريني اره لشتيريب، قوتيلرگه جايشلريب، محكملشماقده لر.

ميرويسگه كوره، اولر بو يگانه روب ايشلب چيقه ريشده بير ميليون و تورت يوز مينگ دالر سرمايه ياتقيزگن. ايشلب چيقه رووچي زمانوي ماشينلرني هم خارجدن وارد قيليشگن:"ييليگه 500 تون پامه دير روب ساته ميز. ايشلب چيقرگنيميزني ساته يوباره ميز. روب ايشلب چيقه ريشده ماده لرني ذخيره قيلينمه يدي. پامه ديرني اكثرآ بلخ واونگه قوشني ولايتلردن جوزاييدن باشلب ساتيب آله ميز. حتي بغلان و لوگر ولايتلري دهقانلريدن پامه دير ساتيب آله ميز. ييليگه اون مينگ كارتن دن آرتيق پامه ديرساتيب آله ميز".

مزارشريف ده ايشلب چيقه ريله ياتگن روب و اوي بوياغلري فقط مزارشريف ايمس، بلكه ولايتلرگه هم صادر ايتيله دي.

حاجي عبداللرحمن اسملي هيداوچي جوزجان دوكاندارلريگه شو فابريكه ده ايشلب چيقه ريلگن اوي بوياغلرينی ولایتلرگه ییتکزه یاتگنلردن بیری.

ايتيليشيچه، سيلاولر نتيجه لري اعلان بولمه ياتگني، حتي بو فابريكه لرنينگ اوز خادملري سانيني كمه يتيريشده تاثير سالگن:"سيلاو همه نينگ ايشيگه تاثير قويدي. مشتري يوق، اگر مشتري بولسه، حتي قيرق نفر خادم بو ييرده ايشله يدي. شو سبب دن تورت پايه ماشينيميز ايشدن توخته گن. تقاضا بولسه، خادم هم كوپه يتيريله دي".

مزارشريف ده سونگي اون ايكي ييل مابينيده شونده ي خصوصي فابريكه لر ايجاد ايتيليب، تورلي خيل توارلر و جنس لر ايشلب چيقه ررايكن، اما دولت گه قره شلي فابريكه لر خصوصيلرگه قره گنده، فعاليت دن توشيب قالگنلر.

اولردن بيري بلخ كاله ايشلب چيقه رووچي نساجي فابريكه سي.

بو فابريكه قريب 55 جريب يير قمراوييده قوريلگن. فابريكه ده ايكي ايشلب چيقه رووچي كمپليكس موجود. روسي و فرانسه وي.

بيرينجي كمپليكس ده 210 ته توقووچي ماشين اورنه تيلگن. فابريكه گه قره گنده حاضر 700 نفر كارگر بو يرده ايشلشي كيره ك و ييليگه كميده 8 ميليون متر كاله ني ايشلب چيقه ريشگه قادر.

فابريكه رييسي انجنیر محمد شریف گه كوره، اگر بو فابريكه قيته قوريلگن حالده، ييليگه 12 ميليون 1 يوز 74 متر كاله ايشلب چيقيشد قادر. اما شونگه قره مسدن بو نینگ یانیده بیر نیچه اورته وکیچک ایشلب چیقه رووچی فابریکه لر ایجاد ایتیلگن و تورلی خیل اشیالرنی ایشلب چیقرماقده.

سابق بو فابريكه ده 1 مينگ 5 يوز و 50 نفر كارگر ايشل بيلن مشغول بولگن، اما حاضر اون ـ اون بيش نفر خادم ايشلشه دي خلاص.

مزارشریفده ایشلب چیقه رووچی فابریکه لر سانی آشیرکن، بولرنینگ توارلری بازارده هم آشماقده.

خریدارلرگه کوره، اولر اکثرآ وطنی محصولاتلرنی خوش قرشیلشه دی. چونکه بیر طرفدن ارزان و باشقه تمان صفتلی.

عین حالده، شمال زون آیسا اداره سی مسووللری هم موجود فابریکه لر محصولاتلری صفتی و خارجی محصولاتلرگه رقابت قیله یاتگنی دن خرسند.

بو اداره رییسی محمدصدیق مرادی نینگ ایتیشیچه، حاضرگه قدر کمیده 3 یوزدن آرتیق شرکت وفابریکه اولرنینگ اداره سیده رویخط دن اوتکزیلگن.

اونگه کوره، بولردن قریب 15 فایزی تدبیرکار عیاللرتمانیدن باشقریله دی.