قندوزده یوزبیریب کیله یاتگن اوروش تلفاتی باره سیده فرقلی رقملر بیریلماقده

Image copyright

قندوز پلیس قوماندانلیگیگه کوره، اوشبو ولایت ده اهالی قرشیلیگیگه دوچ کیلگن قوراللی مخالف لر محل اهالیسیدن 20 نفرنی جمله دن سابق جهاد قوماندانلري دن بيري بولگن قديرقوماندان ني اولديریگن.اما قندوز حاکمی بورقمنی تصدیق لمیدی.

قندوز پوليس قوماندانليگي مطبوعات خذمتي مسووللي سيد سرور حسيني نينگ ايتيشيچه، بوندن بير نيچه كون آلدين قندوزنينگ مركزي حدوديده جايلشگن كنم خورد، حضرت سلطان و اليكه قيشلاقلريگه عشر و ذكات ييغيشتيريش مقصديده كيلگن بير گروه قوراللي مخالفلر محل اهالي سي نينگ قرشيليگيگه دوچ كيليشگن. بو قرشيليك نتيجه سيده قوراللي مخالفلر محل اهاليسيدن 20 نفريني جمله دن سابق جهاد قوماندانلري دن بيري بولگن قديرقوماندان ني اولديريب، باشقه 20 كيشيني يره لنتيرگنلر.

حسيني گه كوره، طالبان نينگ بو هجوملري واهالي گه اوتكزگن جبرلري عاقبتيده اونلب عايله اوز اوي جايلريني ترك ايتيشگن و شو مسله سبب بوگون ايرته لب، افغان قوشمه كوچلري منطقه ني تازه لش اوچون عمليات يولگه قوييب، نتيجه ده اولرنينگ ايكي سركرده سي شامل 16 نفري نابود قيلينگن و باشقه 6 نفري يره لنگن.

اما قندوز ولایتی نینگ ولایت حاکمی غلام سخی بغلانی بی بی سی بیلن بولگن صحبتیده یوزبیریب کیله یاتگن توقنه شوولرده آلتی غیر مسوول قوراللی وسککیز تینچ فقرا قربان بولگنینی تصدیق له دی.

اونگه کوره بیرقنچه عایله لر هم اوروشلرباعث اوز اوی جایلرینی ترک ایتیشگه مجبور بولگنلر. شونینگ دیک قندوز حاکمی اوشبو ولایت نینگ نیچه تومنیده توقنه شوولر دوام تارتیب کیله یاتگنینی ایتدی.

ايتيليشيچه، نابود قيلينگن طالبان جسدلري اوروش ميداني ده قاليب، عمليات قندوز پوليس قوماندانليگي رهبرليگيده همان دوام ايتماقده.

عینی حالده تخار ولایتی نینگ خواجه غار تومنیده هم طالبان و محلی پلیس کوچلری اره سیده توقنه شوولر دوام ایتیب کیله یاتگنی ایتیلماقده، تخار ولایت حاکمی سوزچیسی سنت الله تیمور اوچ کوندن بیری اوروش دوام تارتیب کیله یاتگنینی ایتیب. حاضرگه قدر ایککی محلی پلیس هلاک بولگنینی معلوم قیلگن. همده تیمور جنابلری مذکور توقنه شووده 17 طالب هم اولیب یره لنگنیدن خبر بیرگن.