زاخیل وال:سیلاوجنجللری بیش میلیارد دالر مملکت اقتصادیگه خساره ییتکیزگن

افغانستان مالیه وزیری بی بی سی بیلن بولگن صحبتیده جمهوررییسلیک سیلاو گه عاید جنجاللذر چوزیلیشی سبب بیش ملیارد دلار مملکت اقتصادیگه خساره ییتکیزگنینی ایتدی، همده او قریب التی ملیارد مملکت دن چیقیب کیتگنینی تاکیدله گن.

همده او، جاری وضعیت دوام تارتسه دولت اوز ایشچیلری ایللیک لرینی بیره المی اوزمانده جدی بیر بحران یوزبیریشی ممکن لیگیدن تشویش بیلدیردی.

ایکینچی دور جمهوررییسلیک سیلاو معماسی چوزیلیشی افغانستان اقتصادیگه منفی تاثیر قالدیرگنی قطار تشویش لرگه سبب بولگن، کوپچیلیک سرمایه یاتقیزوچیلر اوز سرمایه لرینی الیب چیققن

افغانستان مالیه وزیری حضرت عمر زاخیل وال حاضرگه قدر سیلاومعماسی بیش میلیارد دن ارتیق دلار مملکت اقتصادیگه خساره ییتکیزگنی، قریب التی میلیارد دالر مردم تمانیدن بانک لرگه یغیلگن پول مملکت دن چیقه ریلگنی باره سیده تشویش بیلدیریب شوندی دیدی:"سیلاولر کیله سی هفته لرده نیتجه گه ایریشیشی ممکن اما نتیجه گه ایریشگن حالده هم اوزاق مدت منفی تاثیری قالیشی ممکن."

شونینگدیک زاخیل وال جنابلری ایککینچی دور جمهورریسلیک سیلاو عاید جنجاللر ینه هم چوزیلسه بو مساله بحرانگه اوزگریشدن تشویش بیلدیردی. اونگه کوره شوندی بیروضعیت حکومت دولت ایشچیلری ایلیک لرینی هم تولشگه قادر بولمه ییشی ممکن:"

اگر بوندن کوره هم چوزیلسه بیر بحرانگه اوزگریشی ممکن، بحران شوکی دولت درامد قولکه کیریته آلمی ایشچیلر ایللیک لرینی تولشگه قادر بولمیدی. خدا قیلمه سین ،اگر حکومت خادملر ایللیک لرینی توله آلمسه بونی اوزی جدی بیر بحران."

زاخیل وال جنابلری سیلاومساله سی تیزلیک بیلن حل ایتلمه گنی باعث مالیه تولش درامدی کمیگنینی ایتگن، شوسبب وضعیت شوندی دوام تارتسه دولت اوز خادملری ایللیک لرینی کمیتیریش همده ایریم ایشچیلرنی ایشدن بوشه تیشگه قرار آلیشی ممکن لیگی بیلن آگاه لنتیرگن.

مالیه وزیرلیگی نینگ اعلام قیلشیچه، دولت نینگ بو ییلگی درامدی اوتگن ییلگه قره گنده 25 فایز کمیگن. مالیه وزیری بیش ملیارد دلار خساره باره سیده اچیق معلومات بیرمه گن، اما اقتصاد متخصص لری افغانستان مالی بودجه سی چیت ایللیک یاردملرگه باغلیق بولگنی سبب هردایم شوندی قینچلیک لر بیلن روپه را ایکن لیگینی ایتگن.

ماليه وزيرليگي شونينگ ديك، بوييليگي عادي بودجه ايچكي درآمدلردن تامينلنيب، اوتگن ييلگه نسبتآ كميده 9 ميليارد افغاني كمه يشي ممكنليگي ني ايتگن.

بوندن تشقري خارجي ياردملر ميزاني هم جاري ييلده دولت بودجه سيگه يوقاري مقياسده باسيم اوتكزگن. بونگه امريكا و كابل اورته سيده گي خوفسيزليك بيتيم امضالنمه گني و افغانستانده بعضي بير مهم قانونلر تصديقلنمه گني سبب قيليب كورستيلگن.

ييل باشيده هم افغانستان بودجه سي سينگني 446 ميليون دالر ديب اعلان قيلينگندي. اما حاضر بو سينيش ميزاني نيچه برابر آشگني ايتيله دي.

امريكا و كابل اورته سيده گي خوفسيزليك بيتيم امضالنمه گني هم افغانستان اقتصاديگه نقصان ييتكزگن.

اما افغانستان، كانلر و نادولت منبعلردن 479 ميليون دالرليك درآمد قولگه كيليشي احتمالي ني ايتگندي، اما حاضرچه كانلر قانوني تصديقلنمه گني باعث، بودجه ني تامينلشده قادر بولالمه ي، حتي خارجي سرمايه گزارلرنينگ مملكت ني ترك ايتيشلريگه سبب بولگن. بيرقطار ياردم بيرووچي تشكيلاتلر هم افغانستان دولتيگه بيره ياتكن ياردملريني توخته تيشگن.

جاري ييلده افغانستان دولتي وزيرليك و اداره لري نينگ عادي و رواجلنتيريش بودجه لري 7.9 ميليارد دالر اعلان قيليگندي. ماليه وزيرليگي گه كوره، بوندن 7.5 ميليارد دالري تامينلنگن خلاص.

بو مقداردن 2.3 ميليارد دالري ايچكي و 5.1 ميلياردي خارجي ياردم منبعلردن تامينلنيشي كيره ك ايدي.