بلخ ولایتی چمتال تومنیده 48 نفر قوراللی مخالف نابود قیلینگن

بو مخالفلر چمتال تومنی نینگ البرز منطقه سیده اوتکزیلگن حربی عملیات ده نابود قیلینگن.بلخ ولایتی امنیه قوماندانلیگی مسووللریگه کوره، بو عملیاتده باشقه 32 نفر مخالف هم تن جراحتی آلگن.

بلخ امنیه قوماندانلیگی خوفسیزلیک آمری عبدالرزاق قادری نینگ بی بی سی گه ایتیشیچه، مذکور مخالفلر چمتال تومنی نینگ البرز، چشمه گذر وقراول منطقه لریده اوچ کوندن بیری یولگه قوییلگن تازه لش عملیاتده مذکور منطقه لر مخالفلرنینگ تصرفیدن تازه لنگن.

قادریگه کوره، بو عملیات جریانیده خوفسیزلیک عسکرلردن اوچته سی قربان بولگن و باشقه اوچ نفر یره لنگن.

عملیات اوچ مراتبه کیتمه کیت عملگه آشیریلگن.

خوفسیزلیک آمریگه کوره، اولیب یره لنگن قوراللی مخالفلر ایچیده اولرنینگ بیرقطار قوماندانلری موجود بولیب، جسدلری اوروش میدانیده قالگن.

قادری نینگ معلوم قیلیشیچه، عملیات ملی اردو، پولیس وملی خوفسیزلیک کوچلری اشتراک ایتیشگن.

اما اوزینی طالبان سورچیسی دیب تنیشتیرگن ذبیح الله مجاهد، البرزده خوفسیزلیک کوچلرنینگ اون تورت نفرینی اولدیرگنلیکلرینی ادعا قیلیب، باشقه 18 ته سی یره لنگنینی ایتگن.

اونگه کوره، طالبان خوفسیزلیک کوچلری کروانیگه هجوم قیلگنی آرتیدن، هوا دن هجوم عملگه آشیریلگن و طالبان گه تلفات ییتمه گن. لیکن توقنه شوو جریانیده اولردن بیرنفر اولگن و ایکی ته یره لنگن.