سیلاو تقدیرینی حل قیلوچی مذاکره لر ایککی نامزد آره سیده یولگه قوییلگن

Image copyright EPA

ایککی سیلاوتیم سوزچیلریگه کوره، اجراییه ریس صلاحیت لرینی انیق لش اوچون ایککی نامزد آره سیده مذاکره لر دوام ایتیب کیلماقده، اجراییه رییسی کابینه رییسی هم بولیش بولمسلیگی اساسی جنجال گه سبب بولگن.

ایککی سیلاوتیم هم خلق ارا و ملی واسطه چیلگی ارقه لی ایککی نامزد ملاقات اوتکزه یاتگنینی ایتیب، بو ملاقات ده نهایی قرار اعلان ایتیلیشیگه امید بیلدیردی.

عبدالله سیلاو تیم سوزچیلریدن فضل الرحمان اوریا بی بی سی بیلن بولگن صحبتیده ایککی نامزد اوچ اختلافلی موضوع خصوصیده صحبت آلیب باره یاتگنینی ایتیب، اختلافلی موضوع لر باره سیده کیلیشیلسه ملی بیردملیک دولت تشکیل ایتیلیشی اوچون قوشمه اعلامیه صادر ایتلیشینی تیلگه آلدی. اما جناب اوریا اوچ اختلافلی موضوع باره سیده آچیق معلومات بیرمه دی.

باشقه تاماندن اوریا جنابلری بو مذاکره هم نیتجه سیز یکون تاپسه سیلاو خصوصیده گی بحران ینگی شکلی بیلن دوام ایتیشی ممکن لیگینی اورغوله دی.

بیراق اشرف غنی احمدزی سیلاو تیم سوزچیلریدن فیض الله ذکی بی بی سی بیلن بولگن صحبتیده نیچه ساعت دن سونگ ایککی نامزد نهای قرار گه ایریشیشی ممکن لیگی گه امید بیلدیردی.

ایککی نامزد بوندن الدین هم ملی بیردملیک حکومت تشکیل ایتیش اوچون نیچه بار مذاکره اوتکزیب، اجراییه رییس صلاحیت لری باره سیده کیلیشه آلمه گن ایدی. چونکی عبدالله عبدالله سیلاوتیمی اجراییه رییسی کابینه رییسی هم بولیش طلبینی ایلگری سوریب، اما مقابل تیم بونی قانونگه قرشی ایکن لیگینی ایتگن ایدی.

اشرف غنی احمدزی سیلاو تیم سوزچیسی فیض الله ذکی اجراییه رییس صلاحیتی باره سیده تحول و تداوم تیمی نینگ الدینکی موقعیگه قندی اوزگریش کیلگن دیگن سوراققه شوندی جواب بیردی:" هربیر اوچره شووده فکرلر یقین لشگن، کیلیشه آلمه گن اساسی مساله اجراییه رییسی کابینه رییسی بوله دی می یاکی یوق دیگن مساله ایدی، البته کی اجراییه رییسی حکومت رییسی بوله آلمیدی، چونکی اساسی قانونده جمهوررییس کابینه رییسی دیه قید ایتیلگن. ایککینچی مساله هم سیلاو نتیجه لری حقیده ایدی. سیلاو نتیجه سی اعلان بولیشیدن الدین سیاسی مذاکره لر نیچه بیره دی می یوق دیگن مساله. "

عینی حالده او، ایککی نامزد اره سیده امضالنگن الدینکی سیاسی کیلشووگه قره گنده سیلاو نتیجه سیدن سونگ ملی بیردملیک حکومت تشکیل ایتیلیشی تاکیدلنگنینی ایتدی.

ذکی جنابلری نینگ بو مناسبتی گه قره گنده اجراییه رییس صلاحیتی باره سیده اوشبو تیم نینگ آلدینکی موقعیگه هیچ قندی اوزگریش کیلمه گن.

ایککینچی دور جمهوررییسلیک سیلاو خصوصیده پیدا بولگن جنجاللرگه برهم بیریش اوچون امریکا تشقی ایشلر وزیری واسطه چیلیگی بیلن ملی بیردملیک دولت تشکیل ایتیلیشیچه قرار قبول قیلیندی، ایککی سیلاوتیم سیاسی مذاکره لر جریانیده اجراییه رییسی قندی صلاحیت گه ایگی بولیشی خصوصیده کیلیشه آلمه دیلر.