افغانستان سيلاو نامزدلري كيليشووگه ايريشگنلر

Image copyright AFP

افغانستان جمهور رييسليك سيلاو نامزدلري نينگ يوقاري مرتبه لي اعضالري نينگ بي بي سيگه ايتيشيچه، ايكله تمان نينگ ملي بيردمليك دولت تشكيل ايتيش باره سيده گي جنجللري برطرف ايتيلگن.

عبدالله عبدالله و اشرف غني احمدزي تيمي نماينده لري گه كوره، ملي بيردمليك دولت تشكيل ايتيش كيليشوونامه سي بوگون امضالنیشی ممکن.

بي بي سي قولگه كيريتگن معلوماتلرگه قره گنده، ايكله تمان كيليشوونامه مضموني ني تورت صحيفه ده تيارله گن و اونده حاكميت تقسيمي و ملي بيردمليك دولت تشكيل ايتيش شيوه لري قيد ايتيلگن.

بو معلوماتگه كوره، عبدالله عبدالله و اشرف غني احمدزي تيملري اعضالري جنجللر بوتكول برطرف ايتيليب، ايكله تمان قدرت 50 ـ 50 تقسيم لنيشي باره سيده كيليشيب آلگني ني ايتگنلر.

افغانستان جمهور رييسليك سيلاوي نينگ بيرينچي دوري بو ييل حمل آيي 16 ده اوتكزيلدي و سكيز نامزد دن ايكي نامزد ايكينچي دور گه رقابت گه توشدي. اما بو دورنينگ نتيجه سي بوگونگه قدر اعلان ايتيلمه ي قالدي.

سيلاولر نتيجه لري اعلان ايتيليشي بيلن ينگي جمهور رييس نينگ تحليق مراسمي بوندن ايكي آي آلدين اوتكزيليشي كوتيلردي،اما سيلاو نتيجه لري باره سيده جنجللر اوني كيچيكتيردي.

عبدالله عبدالله سيلاو تيمي نتيجه گه قرشليك بيلديريب، قدرت برابر ترقه تيليشي ني طلب قيلدي. اما جنجللر حل ايتيليشي اوچون بيرلشگن ملتلر تشكيلاتي وامريكا هم واسطه چيليك قيلدي و ايكله نامزد ني بيردمليك دولت تشكيل ايتيشگه اونده دي. اما نامزدلربونگه راضيليك بيلديرمه ي، سيلاو جنجللري دوام ايتديريلدي.