BBC navigation

افغانستان ینگی جمهور رییسی اشرف غنی احمدزی

Сўнгги янгиланиш 22 сентябр 2014 - 07:59 GMT

اشرف غنی احمدزی حامدکرزی حکومتی نینگ تورلی بولیملریده ایش آلیب بارگن. او اوتگن دور جمهور رییسلیک سیلاوی ده هم اوزینی نامزد قیلگن ایدی.

آلتمیش یاشلیک اشرف غنی احمدزی پشتون قومیگه منسوب. او جنوبی لوگر ولایتیدن بولیب، افغانستان نینگ علمی سیمالریدن بیری حسابلنه دی.

احمدزی جنابلری لبنان و امریکا ده تحصیل آلگن. جمعیت شناسلیک بوییچه دوکتور و جهان بانکیده ایشله گن تجربه کار.

جناب احمدزی اوتیز ییل سورگینلیک دن سونگ، طالبان حکومتی آغدریلیشی بیلن افغانستان گه قیتدی. بیرینچی دن بیرلشگن ملتلر تشکیلاتی بیلن ایشلردی. کیینچه لیک اوتیش دور حکومتیده کرزی کابینه سیگه کیردی.

آز مدت اوتیشی بیلن احمدزی جنابلری افغانستان حکومتی و جهان آره سیده علاقه اورنه تیش کوپریگی صفتیده افغانستانگه کتته یاردملر کورستیلیشیگه اولکن حصه قوشدی. همده او، بجرگن فعالیتلری آرتیدن افغانستان مالیه وزیری صفتیده تعیین لندی.

اشرف غنی احمدزی نینگ بیرینچی اورین باسری ژنرال عبدالرشید دوستم

1393 ییل جمهور رییسلیک سیلاویده ژنرال عبدالرشید دوستم و سروردانش اونینگ بیرینچی و ایککینچی اورین باسرلری ایدی. سنبله آی نینگ اوتیزینچی سیده اعلان ایتیلگن سیلاو نتیجه سی اساسیده، اشرف غنی احمدزی جمهور رییس صفتیده اعلان ایتیلدی.

کوپچیلیک اشرف غنی احمدزی نی غرب فرهنگی بیلن تانیش بولگن بیر تکنوکرات بیله دی.

میلادی 2009 ییلده بولیب اوتگن جمهور رییسلیک سیلاویده او فقط اوچ فایز آواز قولگه کیریتدی، 1393 ییل جمهور ریسلیک سیلاوی نینگ بیرینچی دوریده 37 فایز آوازنی کسب ایتیب، سیلاو نینگ ایککینچی دوریگه یول تاپدی.

ایککینچی دور جمهور رییسلیک سیلاو نتیجه سی فایزی انیق لنمه ی، سیلاو مستقل کمیسیونی تامانیدن اشرف غنی احمدزی افغانستان جمهور رییسی صفتیده اعلان ایتیلدی.

اشرف غنی احمدزی نینگ ایککینچی اورین باسری سرور دانش

جناب غنی کرزی حکومتی تامانیدن فسادگه قرشی یولگه قویلیب کیلگن برنامه لرنینگ موفقیت سیزلیگیگه، باشقریش ایشلری ضعیفلیگی نی اساسی عامل دیه تاکیدله دی.

اشرف غنی احمدزی سیلاو آلدی تبلیغی برنامه لر جریانیده جمهوریتلیک تیزیمی طرفدارلریدن ایدی، اما عبدالله عبدالله بیلن امضالنگن کیلشوو شرطنامه سیده، تیزیم نی اوزگرتیریش اوچون لویه جرگه قرار آلیشی کیره کلیگی باره سیده سوز بیردی. کیلیشوو بیتیمیده ایککی ییلدن سونگ لویه جرگه برپا ایتیلیشی قید ایتیلگن.

کیله جک هفته لرده جناب غنی سیلاو رقیبی عبدالله عبدالله تیمی اشتراکی بیلن شرطنامه اساسیده ایجاد ایتیلیشی کوتیله یاتگن "ملی بیردملیک" حکومت رهبریتینی اوز ذمه سیگه آلیشی ممکن.

BBC © 2014 BBC tashqi sahifalar uchun ma'sul emas.

Ushbu sahifani CSS veb-brauzerida tomosha qilgan ma'qul. Hozirgi veb-brauzeringiz Sizga to'la vizual imkoniyatni bermaydi. Marhamat qilib o'zingizning brauzeringizni CSS veb-brauzeriga yangilash haqida o'ylab ko'ring.