احمدزی : ملی بیردملیک حکومتی افغان خلقیگه مسول

افغانستان نینگ ینگی جمهور رئیسی اشرف غنی احمدزی بوگون کابلده اوزی نینگ ایلک یغینیده ، ملی بیردملیک حکومتی افغان خلقی گه مسوول دیب تاکید له گن . امانی لیسه سیده یولگه قوییلگن یغینده صحبت لشگن احمدزی جنابلری اوزی نینگ یوزلب طرفدار لری تمانیدن کوتیب آلیندی .

او افغانستانده تاریخیده قدرت نینگ بیر جمهور رئیس دن ینگی جمهور رئیسگه تینچ یول بیلن تاپشیرلیشنی آلقیش له گن.

شونینگ دیک اشرف غنی احمد زی تشکیل ایتیله دیگن ینگی حکومت مملکت ده ملی بیردملیکنی کوچی تیریشنی ایتیب موجود هماهنگ باشقه حکومت لر نی اورته دن آلیب کیتیشیگه سوز بیرگن.

همده او، ملی بیردملیک حکومت سهامی بیرشرکت گه ایلنمسلیگی نی تاکید له گن .

"ملی بیردملیک حکومت هر افغان گه جواب بیریشگه مسوول ملی بیردملیک حکومتی قانون ، اجتماعی عدالت ، شفافیت ، کفایت و مسوول حکومت بولیشی کیرک." دیب ایتگن اشرف غنی احمد زی.

عینی حالده احمدزی جنابلری حکومت ده کی مسوولیت لر ملکه لی شخص لرگه تاپشیریلیشینی ایتیب، آلینگن ریجه و تدبیر لر اساسیده موجود قینچلیک لرنی برطرف ایتیلیشیگه امید بیلدیردی.

قسم یادگه کیلتریش مراسمی

افغانستان دولتی ینگی جمهوررئیس نینگ قسم یاد گه کیلتریش مراسمی نینگ کیله سی هفته ، دوشنبه کونی ، یولگه قوییلیشنی اعلام قیلگن .

تحلیف مراسمی اوچون تشکیل ایتیلگن کمیته مسووللریگه کوره، قطار تشقی مملکتلر نینگ یوقاری مرتبه لی ملازم لری هم بو مراسم گه دعوت ایتیلگن.

اوتگن کون مستقل سیلاو کمیسیونی سیلاو نینگ نهای رقم لرینی اعلام قیلمسدن اشرف غنی احمدزی نی ینگی جمهوررئیس و عبدالله عبدالله نی اجراییه رییسی صفتیده اعلام قیلگندی.

افغانستان مستقل سیلاو کمیسیونی گه کوره بو قرارنی نامزد لرنینگ کیلشو لری اوچون اعلام قیلمه گنینی ایتگن.

جمهور رئیس لیک سیلاو نامزد لری عبدالله عبدالله و اشرف غنی احمدزی لر آیلرچه دوام ایتگن سیلاو بحرانی آرتیدن افغانستانده خلق آرا هم جمعیت دولتلری، بیرلشگن مللت لر تشکیلاتی و افغانستان حکومتی نینگ اره لشو بیلن ملی بیردملیک حکومت نینگ قوریشینی قبول قیلگنلر.

عینی دمده سیلاو نینگ نهایی نتیجه لرینی اعلام ایتلمه گنی قطار مستقل تشکیلات لر تمانیدن تنقید آستیگه آلینگن .

ایرکین وعدالتی سیلاولرنی حمایت ایتوچی افغانستان لیک فیفا ناملی تشکیلات ایککی نامزد اره سیده کیلشوو بیتم امضالنگنینی خوش قرشی له گن بولسه ده سیلاونتیجه سی نینگ انیق لنمی اعلام ایتیلیشی دموکراسی اصوللریگه ضد بیر عمل بولگنینی ایتگن.

اوشبو تشکیلات سوزچیسی فهیم نعیمی:

"سیلاو قانونلری اساسیده سیلاو مستقل کمیسیونی سیلاو نتیجه سینی برچه تفصیلاتی بیلن اعلان ایتییشی کیره ک ایدی، قنچه خلق اشتراک ایتگن، رایلر سانی قنچه ، نامزدلر نیچه فایز رای آلگن بوکبی موضوعلر، اما بحران اوته جدی بولگنی اوچون سیاسی مذاکره لرگه کوپراق اعتباربیریلدی. نتیجه فایزی اعلان ایتیلمه گنینی ارقه گه قیتیش بیله میز، هرحالده افغانستان واقعیت لریگه قره گنده باشقه قندی دیر یول یوق ایدی." دیب ایتگن اوشبو تشکیلاتی سوزچی سی فهیم نعیمی.

عینی حالده سیلاو نی کوزه تیش بویچه تشیکیلات ناملی باشقه بیر تشکیلات مسوولی جانداد اسپین غر هم سیلاو کمیسیون نینگ جمهورریسلیک سیلاو نتیجه سی باره سیده گی قرارینی اصولی بولمه گنینی ایتدی.

شونگه اوخشش سیلاو آواز لرنی تیکشیریش جریانیده حصه قوشگن اروپا اتفاقی ناظرلری سیلاو لرنینگ نهایی نتیجه لری نینگ اعلام ایتلمسلیگی دن افسوس بیلدریب، سیلاو لر جریانیده ساخته کارلیک لر افغانستان نینگ برچه ولایت لریده روی بیرگنینی ایتگن.

شونینگ دیک طالبان گروهی بیر اعلامیه نشر ایتیب ینگی حکومت نی سهامی بیرشرکت اتب ساخته جریان ارقه لی خارجیلر تامانیدن اورته گه کیلگنینی ادعا قیلگن. شونینگ دیک بو گروه ینگی حکومت نی رد ایتیب بونگه قرشی مبارزه لریگه دوام ایتتیریشلرینی تاکیدله گن.