مالیه وزیرلیگی: هییتدن آلدین دولت خادم لریگه معاش بیره آلمه یمیز

بوگون افغانستان مالیه وزیرلیگی بودجه بولمه گنی سبب هییت دن آلدین اوز خادم لریگه آیلیک لرینی بیره آلمسسلیگی نی معلوم قیلدی.

بوندن آلدین مالیه وزیری دولت خادملریگه آلیش لرینی توله آلیشی اوچون دنیا هم جمعیت مملکت لری یوزلب میلیون دالر یاردم طلب قیلگندی.

بو وزیرلیک ییترلی بودجه بولمه گنی گه سیلاو جنجاللری سبب درآمدلرآزیگنی واوز وقتیده سالیق لرنی ییغیب آله آلمسلیگی لرینی سبب قیلیب کورستگن ایدی.

دولت خادم لری عادتده هرییلی هییتدن نیچه کون آلدین آیلیک لرینی آلردیلر. اما بوییل مالیه وزیرلیگی بونی اوز وقتیده تولشگه قادر بولمه گن. بو مساله دولت خادم لرینی قیین احوال سالگن.

هییت مراسمی نی اوتکزیش کوپگینه خرجت لر بیلن بیرگه بوله دی. اکثر دولت خادم لری فقط گینه دولت تاماندن بیریله دیگن معاشگه قره ب قالگن.

دولت خادم لری نینگ کوپچیلیگی آیلیک آزلیگی سبب روزگار مجبوریت دن باشقه ایشلرنی قیلیشگه مجبور.

ایریم استادلرنینگ ایتیشیچه باشقه کسبی بارلرگه اونچه قیین ایمس ، اما باشقه ایشی بولمه گن دولت خادم لری اوچون اینیقسه کوپ خرجت بیلن بیرگه بولگن هیتده معاش بیریلمسلیگی قیین توشه دی.

بوندن آلدین غربی رسانه لرمالیه وزیرلیگی رسمی لریدن نقل قیلیب دولت خادم لری معاشی کیچیکتیریلیشی باره سیده گزارش قیلگندی.

افغانستان مالیه وزیرلیگی بوگزارشنی رد ایتیب فقط هییت دن آلدین بیره آلمسلیک لرینی ایته دیلر.

بو وزیرلیک خزینه لررئیسی محمد آقا کوهستانی دولت خادم لری معاشی باشقه آیلردیک انیق تاریخده بیریله دی.

شونینگ دیک کوهستانی جنابلری میزان آیی معاشینی آی نینگ 15 کونیده تولش لرینی ایتدی.

بوندن بیرمدت آلدین افغانستان مالیه وزیری حضرت عمرزاخیل وال سیلاوجریانی چوزیلیب کیتگنی سبب مملکت اقتصادی کمیده 5میلیارد دالرضررکوریب و6میلیارد دالرهم اهالی تاماندن تشقریگه آلیب چیقیلگنی نی ایتگندی.

شونینگ دیک بو وزیرلیک دنیا هم جمعیت مملکت لریدن دولت خادم لری آیلیگی نی بیریش اوچون 500 میلیون دالردن آرتیق مبلغ یاردم سوره گندی.

رسمی معلومات لرگه قره گنده حاضرگی کونده دولت چوکاتیده کمیده 900یوزمینگ کیشی خذمت قیلیب آیلیک آله دی.