طالبان سوزچی سی : مین پاکستانده ایمس، افغانستانده من

Image copyright BBC World Service

طالبان نینگ واعظی دیب اوزینی تانیشتیره دیگن ذبیح الله مجاهد اوز توییتر حسابیده پاکستان نینگ سند ایالتی ده موجود لیگنی رد ایتیب، افغانستان نینگ ولایت لریدن بیریده فعالیت آلیب باره یاتگنینی ایتگن.

اونینگ ایتیشیچه هییت مناسبتی بیلن اعلان قیلنگن توییت لرگه دشمن نینگ استخبارات خذمتی کیریب، موقعیتینی پاکستان نینگ سند ایالتی دیب یازگن.

بوندن بیر کون مقدم جناب مجاهد نینگ توییتر حسابیده، موقعیتی پاکستان نینگ سند ایالتی دیب یازلگندی.

او قربان هییتی، نوروز کبی مناسبت لرده طالبان رهبری ملا محمد عمر نینگ پیام لرینی انترنت ده کی اجتماعی ترماغلر آرقه لی نشر ایتدی.

افغان رسمی لری هر دایم طالبان رهبر لری نینگ پاکستان ده بولگنینی ایتیب کیلگن. بیراق پاکستان ایسه بو ادعا لرنی رد ایتیب کیلگن.

جناب مجاهد بوگون توییتر آرقه لی نشر ایتگن پیامیده " دشمن نینگ استخباراتی" توییتر حسابیمگه کیریب ، موقعیت نی پاکستان دیب یازگنینی ایتگن.

" مین افغانستان نینگ ولایت لریدن بیریده من، امنیتی سببلر طفیلی اوز موقعیتیمنی سر سقلی من" دیب ایتگن طالبان سوزچی سی ذبیح الله مجاهد.

او بوگونگی نشر ایتگن پیامیده افغانستان ده کی تیلفون رقمینی هم یازیب، او بیلن تیلفون آرقه لی علاقه قوره یاتگن لر اونگه تیلفون قیلیشی ممکن لیگنی ایتگن.