سرپلده طالبان پوليس واردوكوچلريگه قتيق ضربه اوريشگن

سرپل ولايتي كوهستانات منطقه سيده ملي اردو عسكرلري طالبان پيستيرمه سيگه توشيب كميده 25 نفر اوليب يره لنگن.

سرپل خوفسيزليك مسووللري حادثه ني تصديقلب، توقنه شوو هلي گچه دوام ايته ياتگني ني ايتيشگن. اولرگه كوره، طالبان نفرلردن 17 اولگن.

بو حادثه اوتگن سرپل ولايتي كوهستانات تومني الف سفيد منطقه سيده يوز بيرگن.

سرپل امنيه قوماندانليگي سوزچيسي كاظم كيهان نينگ بي بي سي ايگه ايتيشيچه، طالبان نفرلريدن 17 نفر اولگن و ملي اردو عسكريدن ايسه، بيرنفر اوليب، و14 عسكريره لنگن. پوليس دن ايسه، تورت نفر اوليب، باشقه تورته يره لنگن.

اونگه كوره، طالبان بو حادثه ده باشقه 7 ملي اردو عسكريني اوزلري بيلن آليب كيتگن.

اونينگ ايتيشيچه، بو حادثه ده ملي اردونينگ 7 ته رنجر موتري، 3 ته حربي تانگ، ايكيته انترنشنل موتر و بيرته كيرينگ اوتگه يانديريلگن.

اونينگ معلوم قيليشچه، هلي هم منطقه ده اوروش دوام ايتماقده. اولراوروش جريانيده آيساف كوچلريدن هوايي ياردم سوره گن، اما آيساف اولرنينگ ياردميگه ييتيب بارمه گن.

اوشونينگ ديك، سرپل مركزي گه يقين بوغاوي منطقه سيده طالبان ملي پوليس گه قرشي هجوم قيليشگن و توقنه شوو دوام ايتگن.

سرپل امنيه قوماندانليگي سوزچيسي ايكله تمان گه ييتگن تلفات لرنينگ انيق رقمي ينه اوزگريشي ممكليگي ني تاكيدله گن.