بدخشانده طالبان گروهی اوندن آرتیق پلیس نی اوزلری بیلن آلیب کیتگن

محلی مقاملرگه کوره، اوتگن کون طالبان گروهی عامه ترتیبنی سقلش و چیگره پلیس کوچلری پوسته لریگه هجوم قیلگن، بدخشان ولایت نینگ پلیس قوماندانلیگی سوزچیسی لعل محمد احمدزی بو هجوملرده تورت پلیس هلاک بولگنینی تصدیق له دی.

احمدزی جنابلری نینگ ایتیشیچه، بدخشان ولایتی نینگ وردوج دومنی صوفیان منطقه سیده قوراللی عصیانچیلر پلیس پوسته لریگه نیچه نقطه دن هجوم قیلیب پلیس نینگ حربی جهازلریگه اوت قوییشگن.

بدخشان پلیسی بوحادثه یوزبیرگندن سونگ منطقه گه قوشیمچه کوچلر یوباریلگنینی ایتیب توقنه شوولر هلی هم دوام ایتیب کیله یاتگنینی تاکیدله گن. شونینگ دیک پلیس سوزچیسی گه کوره، طالبان قوراللی لری هم اغیر تلفات کورگن.احمد زی جنابلری اوندن ارتیق پلیس طالبان تامانیدن اسیر آلینگنینی تصدیق له دی.

اوز اسمنی ایتیشینی ایستمه گن مقاملریدن بیری بی بی سی نینگ محلده گی خبرنگاری گه طالبان اون بیش پلیس نی اوزلری بیلن آلیب کیتگنینی ایتگن.

طالبان گروهی هجوم مسوولیتینی اوز ذمه سیگه آلیب ؛ تورت امنیتی پوسته گه هجوم قیلگنیدن سونگ تورت پلیسی نی اولدیریب وبیرنیچه عسکرنی هم اوزلری بیلن الیب کیتگنینی ادعا قیلگن.

وردوج تومنیده بوندن آلدین هم قتیق توقنه شوولر روی بیرگن ایدی. طالبان گروهی اوتمیشده بدخشان ولایتی نینگ " کران ومنجان تومنیگه هم هجوم قیلیشگن ایدی.

عینی حالده افغانستان مدافعه وزیرلیگی بدخشان ولایتی نینگ ارغنج خوا اولسواللیگیده حربی عملیات یولگه قوییلگنی باره سیده خبربیرگن. اوشبو وزیرلیک سوزچیسی ظاهر عظیمی توتیر صحیفه سیده بو عملیات ده سککیز قوراللی طالب اولیب والتی طالب هم اسیر آلینگنیدن خبربیرگن.