"عربستانده گی افغان ایشچیلریگه ایشلش رخصتنامه سی بیریلیشی ممکن"

Image copyright AP

اوتیزآلتی ییلدن سونگ افغان یشاوچیلریگه سعودی عربستانده ایشلش رخصتنامه سی بیریلیشی کوتیله دی. پاکستان و باشقه چیت ایللیک پاسپورت بیلن سعودی عربستانگه بارگن افغان ایشچیلرسانی 300 مینگ تخمین ایتیله دی.

سونگی بیرنیچه ییل جریانیده پاکستان پاسپورتی بیلن سعودی عربستانگه بارگن یوزلب افغان لرگه افغان پاسپورتی ترقه تیلگن، اما بو برنامه قانیقرلی بولمه گنی ایتیلیب یوزلب مینگ افغان ایشچیلری پاکستان ویاهم چیت ایللیک پاسپورت لربیلن ایش قیلیب کیله یاتگنی ایتیلماقده.

جمهوررییس محمد اشرف غنی کونی کیچه صحبت لرینی بیر بولمیده عربستان دولتی افغان ایشچیلر معماسینی تیز آره ده حل ایتیش وعده سینی بیرگنینی ایتدی:"تشقی باسپورت لر بیلن سعودی عربستانگه بارگن افغانلر سانی 300 مینگه تخمین ایتیله دی،بونگه دلیل هم سعودی عربستان دولتی ثور کودتاسیدن سونگ افغان ایشچیلری نینگ توغریدن توغری افغانستاندن عربستانگه کیتیشلریگه رخصت بیرمه گن. بوخصوصده وعده بیریلگن، خداخواه له سه بو مساله نی حل ایته میز."

عینی حالده افغانستان ایش و اجتماعی ایشلر وزیرلیگی افغانستانلیک پاسپورت گه ایگه بولگن افغان ایشچلریگه ایش ویزه سی بیریش اوچون کیلیشوو بیتم امضاله نیشگه تیارایکنلیگینی معلوم قیلدی. اوشبو وزیرلیک سوزچیسی علی افتخاری:"کیلیشوو بیتم امضالنیشگه تیار، کیلیشوونامه امضالنسه ایککی قینچلیک حل ایتیله دی، بیرینچیدن پاکستان پاسپورت بیلن بارگن افغانلرگه افغانی پاسپورت بیریله دی وایککینچی هم افغان ایشچیلریگه افغانستاندن ایش ویزه سی بیریله دی."

افتخاری جنابلری نینگ ایتیشیچه، افغانلرنینگ پاکستان پاسپورتی بیلن عربستان گه سفر قیلیشلری مملکت اقتصادی و ایشچیلرگه هم منفی تاثیر قالدیرگن.باشقه تاماندن اولر توغریدن توغری افغانستان گه قیتیب کیله آلمیدیلر.

افغان ایشچیلری نینگ تشقی مملکت لر اینیقسه خلیج مملکت لریگه یوباریلیشی ینگی بیر ریجه ایمس، الدینکی حکومت حتی قطر دولتی بیلن کیلیشوو بیتمی هم امضاله دی. اما حاضرگه قدرهم عملی بولمه گن. ایش واجمتاعی ایشلر وزیرلیگی سوزچیسی علی افتخاری ایشچیلر بویچه اتشه بولمه گنی اساسی معما ایکنلیگینی تاکیدلیدی:"بو عرب مملکت لریده ایشچیلر بویچه اتشه آچیلمه سه بیز قینچلیککه قاله میز. چونکی بیز ایککینچی اوچینچی آدرس آرقه لی صحبت قیله میز ایشچلر بویچه اتشه اچیلسه بو مساله لر جدیت بیلن ایزلنه دی."

جمهوررییس محمد اشرف غنی سیلاو آلدی تبلیغی برنامه لر جریانیده مهاجرلر و تشقی اولکه لرده ایش آلیب باره یاتگن افغانلر معماسینی حل ایتیش وعده سینی بیرگن ایدی.

غنی جنابلری نینگ ایتیشیچه ، افغان مهاجرلری تامانیدن آلیب کیلینه دیگن پول افغانستان اقتصادی اوچون اوته مهم همده یوزلب عایله اقتصادی بو پوللرگه باغلیق.