بلخ ولایتیده گی آواره لر آغیر شرایط ده کون کیچیرماقده لر

شمالی بلخ ولایتیگه سونگی بیر ایکی ییل ایچیده طبیعی آفت و اوروشلر عاقبتیده 20 مینگ دن آرتیق عایله قاچیب کیلیشگن. اولر اکثرآ جوزجان، سرپل وفاریاب ولایتلر اهالیسی بولگن.

بلخ مهاجرلر اداره سی اولردن بیرتعدادیگه آذیق آوقت و باشقه ضرورتلرنی یاردم قیلگنینی ایتگن، اما بو یاردملر ییترلی بولمه گن.

مزارشریف شهری نینگ غربی قسمیده کیراگه آلینگن خامه اوییلرده استقامت قیله یاتگن اوچ یوزعایله دن آرتیق قاچقینلر، آغیر شرایط ده کون کیچیرماقده لر. اولر عین زمانده آذیق آوقت، کییم کیچک و باشقه ماده لر گه محتاج. اولر هنوزگچه ییترلی درجه ده یاردم قولگه کیریتمه گنلیکلرینی ایتیشگن.

شاپری سرپل ولایتی دن تورت فرزند و ایکی ییتیم نبیره سی بیلن قاچیب کیلگن. او کیلکین و دروازه سی ویرانه ایلنگن بیرگینه تام ده حیات کیچیره دی. بیر یریم مینگ افغانی کیرایه بیره دی.

او بوندن 9 آی آلدین بو ییرگه قاچیب کیلگن. سرپلده گی اوروشلرده تورموش اورتاغی نی قولدن بیرگن، ایکی نبیره سی ییتیم قالگن. قیته دن سرپل گه کیتیش اوچون جوده هم خوفلی.

فقط شاپری ایمس، بلکه بو ییرده گی بوتون عایله لرنینگ احوالی آغیر. بیر حویلیده 7 ـ 8 عایله هم کون کیچیره دی. اولر ایچیملیک سوو و برق قوه سی بیلن هم تامین ایمسلر. باله لری ایسه، مکتب مدرسه دن اوزاق.

بوآواره لر فقط اوروش دن ایمس، اکثریتی سیلاب، قورغاقچیلیک و باشقه طبیعی حادثه لرعاقبتیده بلخ ولایتیگه قاچیب کیلیشیگه مجبور بولیشگن.

نصیرالدین قریب 7 فرزندنینگ آته سی. اویگه کیره تاپسم، باله لریم کییم کیچک و نان تاپمه ی من، ـ دییدی او.

بو قاچقینلر اوچون همه دن یامانی ساووق کونلر. ایندی قیش هم کیریب کیلدی. بیلن یاردم گه محتاج ایکنلیکلرینی ایترکن، بلخ ولایتی مهاجرلر اداره سی رییسی عبدالصبور قادری، اولراوچون قیش موسیمی ده بیرقطار ایچکی و تشقی یاردم بیرووچی اداره لرنینگ کومگینی جلب ایته یاتگنلیکلری نی ایته دی"اوتگن آیده مهاجرلر وزیرلیگی تمانیدن بیرتعداد قاچقینلرگه یاردم کورستیلدی. کیله سی آیلرده هم وزیرلیک، یو ان سی آر و باشقه بیرقطار یاردم بیرووچی اداره لرنینگ یاردملرینی جلب ایتماقده میز. بوندن تشقری آلمانلیک ابرو انترنشنل اداره سی هم قیش ده یاردم بیریشینی وعده قیلگن".

قادریگه کوره، هرکونی مملکتده روی بیره یاتگن تینچ سیزلیکلرسبب، قاچقینلر سانی هم آشیب بارماقده و اولر بو اواره لرگه هرتمانلمه یاردم کورستیش امکانیتیگه ایگه ایمسلر.

بلخ مهاجرلر اداره سی شونینگ دیک، 2001 ییلدن بویان ایران وپاکستان مملکتلریدن 20 مینگ عایله بلخ ولایتی قیتیشگن و دولت همده خارجی تشکیلاتلر اولرنی اوی جای بیلن تامینلش اوچون شهرچه لر ایجاد ایتیب، اوی جای ترقه تیلگن دییدی.

اما بو ایچکی قاچقینلرنینگ تقدیری آخرـ عاقبت نیمه بولیشی معلوم ایمس. دولت هم اولر اوچون مخصوص جای اجره تمه گن و آواره لر ایسه، قیته دن اوروش محللریگه قیتمسلیگی نی تاکیدله ماقده لر.