بلخ ده ییتینچی دورداستان اثرلرینی سره لش مسابقه سی اوتکزیله دی

بلخ داستان نویسلیک انجمنی ییتینچی دور داستان نویسلیک مسابقه سی اوتکزیشی نی اعلان قیلگن. بو مسابقه گه یاشی 30 دن قویی بولگن نویسنده لرنینگ داستان اثرلری مملکت ایچکریسی و تشقریسیدن دعوت قیلینه دی.

مسابقه ده یوقاری درجه لی داستان مولفلریگه نقده پول هم ساوغه قیلینیشی ایتیلگن.

خانه داستان بلخ نامیده گی بو انجمن ییتی ییلدن بیری مملکت داستان نویسلری نینگ داستان اثرلرینی هر ییلی بیربار مسابقه گه قویه دی.

بو مراتبه یاشی 30 دن قویی بولگن مملکت ایچکریسی و تشقریسیده گی داستان نویسلرنی داستان اثرلرینی مسابقه گه قویشگه دعوت قیلماقده.

بلخ داستان انجمنی اعضالریدن بولگن تقی واحدی، بومسابقه دن اساسی مقصد، داستان نویسلرنینگ یازگن داستانلری درجه سی نی بیلگیلش و اعلی درجه لی داستان نی تنیشتیریش دن عبارت دییدی.

مقصدیمیز یاشلرگه داستان نویسلیککه دقت اعتبار قره تیش و تورتکی بیریش دن عبارت. داستان هم ادبیات نینگ بیر بولیمینی تشکیل بیره دی. بیز اجتماعی علاقه مناسبتلرنی انه شوو داستان آرقه لی حل قیلیش گه امکان تاپه میز. انسانلر آره سیده گی مناسبتلرنینگ قنده ی شکللنیشی و انسانیتگه قرشی قیلینه یاتگن جنایتلرعمومآ آلگن داستانلرده عکس ایتدیریله دی. داستانده گی قهمران لرنینگ قیلیمش عمللری خواننده گه شرایط نی یخشی حس ایتیشده یاردم بیره دی.

بو مسابقه جدی آیی نینگ 20 سیده مزارشریف ده اوتکزیلیشی ممکن.

واحدی یگه کوره،بو مسابقه ده 20 دن 40 ته داستان اثری کوریب چیقیله دی و بیرینچی اورین نی ایگلله گن داستان نویس گه 12 مینگ افغانی نقده پول هم ساوغه قیلینه دی.

ایتیلیشیچه، بو مسابقه ده فقط گینه دری فارسی تیلیده گی داستان لرنی سره له نیب،نقد قیلینه دی.

واحدی شونینگ دیک، بلخ داستان انجمنی مالیوی جهتدن کمچیلیککه روپه ره بولگن، اما شونگه قره مسدن، بلخ ده گی یاشلردن برقطاری نینگ داستان اثرلرینی هم چاپ ایتیشده یاردم بیرگن دییدی.

بلخ داستان انجمنی یاش داستان نویسلرنینگ اثرلرینی اوستیده مسابقه اوتکزرایکن، مردم نینگ داستان گه قیزیقیشی قنده ی بولگن؟ حاضرگی داستانلرنینگ نقد قیلینمه ی یاتگنی و سره نا سره دن اجره تیلمه ی یاتگنی سبب، قدیمی داستان لرگه نسبتآ، آدملرنی اوقیشگه قیزیقتیرمه یدی دییدی، بلخ فرهنگی فعاللردن بیری داکتر خرم.

اما بلخ داستان انجمنی اعضاسی، داستان نویسککه اشتیاق کته، لیکن اکثر نویسنده لر اقتصادی مسله لر سبب، بونی آخرگه ییتیشگه قادر بولالمه گن دییدی.

او بلخ ولایتی ده حاضرگی کونده اون نفر داستان نویسلیک هنری نی دوام ایتدیره یاتگنینی ایته دی.

طالبان قوتیله گنی دن سونگ، فرهنگی ساحه لریده هم باشقه ساحه لر کبی ایجابی اوزگریشلر روی بیردی. اینیقسه داستان ادبیاتی اورته گه کیلدی.

شو دور ده خارج ده گی بیرقطار داستان نویسلرهم وطنگه قیتیب، اثرلر یره ته باشله دی. بو یانینگ یانیده یاشلرهم کته حصه قوشیب، یازیش دن تشقری، داستان نویسلیک نی رواجلنتیریش اوچون، انجمنلر ایجاد ایتیشدی. بلخ داستان انجمنی هم انه شولردن بیری سنه له دی.