کابل ده گی انتحاری هجومده بریتانیا ایلچیخانه سی نینگ نقلیه واسطه سی نشانگه آلینگن

Image copyright AFP
Image caption بریتانیا نینگ کابلده گی ایلچیخانه سی بیر نقلیه واسطه سی هجومچی تامانیدن نشانگه آلینگنینی تصدیق له گن.

کابل پلیس اداره سی کوره، بوگون پایتخت کابل شهری نینگ شرقیده جایلشگن کابل- جلال آباد شاه یولیده یوزبیرگن انتحاری هجومده خارجیلر نقلیه واسطه سی نشانگه آلینگن، بو هجومده بیش کیشی اولیب وباشقه 32 کیشی یره لنگن.

بریتانیا نینگ کابلده گی ایلچیخانه سی بیر نقلیه واسطه سی هجومچی تامانیدن نشانگه آلینگنینی تصدیق له گن.

بریتانیا نینگ کابلده گی ایلچیخانه سی سوزلاوچیلریدن بیری نینگ بی بی سی گه ایتییشیچه، انتحارچی شخص بریتانیا ایلچیخانه سگیه تیگیشلی نقلیه واسطه نی نشانگه آلگن. اونگه کوره بو هجومده نیچه نفر یره لنگن.

Image copyright Reuters
Image caption بریتانیا ایلچیخانه سیگه تیگیشلی نقلیه واسطه بو پارتلشده اورته دن کیتگن.

افغانستان ایچکی ایشلر وزیرلیگی اورین باسری ایوب سالنگی توتیر صحیفه سیده موترسایکل گه مینگن بیرانتحارچی کابل پلچرخی جاده سیده اوزینی پارتلتدی دیب یازگن. سالنگی جنابلری هم خارجیلر گه تیگیشلی موتر نشانگه آلینگنینی ایتگن.

پایتخت ده گی کسلخانه لر مسوولی کبیر امیری بو پارتلش ده کمیده بیش نفر هلاک و بیش باله داخل 34 نفر یره لنگنینی ایتدی.

کابل پلیس اداره سی بیر خبرنامه ترقه تیب مذکور انتحاری هجومده ، بیربریتانیالیک داخل بیش کیشی هلاک و 33 نفر یره لنگنینی ایتگن.

طالبان گروهی هجوم مسوولیتی نی اوز ذمه سیگه آلگن.

Image copyright AFP
Image caption بو انتحاری هجومده بیش نفر هلاک و باشقه 34 نفر یره لنگن.

کابل – جلال آباد شاه یولی پایتخت نینگ ناتینچ جاده لریدن بیری اوتگن هفته لرده هم نیچه بار شوندی پارتلش لریوزبیردی.

دولت وچیت ایللیک لرگه تیگیشلی بیرقنچه اداره لر بو شاه یول ده جایلشگن. اوچ کون الدین کابل شرقیده روی بیرگن پارتلشده ایککی ناتو عسکری هلاک بولدی.