هلمنده گی باستیون حربی قرارگاهی گه اویوشتیریلگن هجومده 26 طالب هلاک بولگن

Image copyright AP

هلمنده گی باستیون حربی قرارگاهیده اوتگن کیچه هم قوراللی هجومچیلر وافغان حربی لری اره سیده توقنه شوو ساعت اون ایککی گه قدر دوام ایتگن. بیرگروه قوراللی عصیانچیلر ایککی کیچه الدین بو قرارگاه گه هجوم قیلگنی خبربیریلگن ایدی.

باستیون حربی قرارگاهیده جایلشگن 215 قول اردو معاونی غلام فاروق پروانی نینگ ایتیشیچه، بوهجومده 26 طالب هلاک بولگن.

پراوانی جنابلریگه کوره، هلاک بولگنلردن ییگیرمه ته سی نینگ جسدلری اوروش میدانیده قالگن و التی نفری هم اوزلرینی پارتلتگن.

شونینگدیک پروانی جنابلری مذکور توقنه شووده بیش ملی اردوعسکری هلاک و باشقه اوچ عسکر یره لنگنینی ایتدی.

طالبان گروهی رسانه لرگه پیام یوللب هجومده اونلب چیت ایللیک و افغان حربیلری هلاک ویره لنگنینی ادعا قیلگن.

هلمنده گی باستیون ییریک حربی قرارگاهی بریتانیالیک لرگه تیگیشلی بولیب قریب بیر آیی الدین افغان کوچلریگه تاپشیریلدی.

حاضرگه قدر ایریم امریکالیک حربیلرهم باستیون حربی قرارگاهیده موجود.

عینی حالده هلمند ولایتی نینگ نوزاد تومنیده یوزبیرگن انتحاری هجومده تورت پلیس هلاک وبیش پلیس یره لنگن.

شونینگ دیک شرقی ننگرهارولایتی نینگ خوگیانی تومنیده مسجد ده یوزبیرگن پارتلشده کمیده 36 نفر یره لنگن.

یره لنگن لر ننگرهار مرکزی جلال آباد عمومی کسلخانه سیگه انتقال بیریلگن. بو حادثه مسوولیتی نی هیچ بیرگروه یاشخص اوز ذمه سیگه آلمه گن.

سونگی وقتلر افغانستان نینگ ییریک شهرلریده ناقرارلیک لر آرتگن.اوتگن اون کون ده ،پایتخت کابلده توقیز انتحاری هجوم وپارتلش روی بیردی.