بدخشان و سرپل ولایتلریده تازه لش حربی عملیاتلر کیچماقده

بدخشانده طالبان نینگ او ولایت اوچون تعیینلنگن والیسی مولوی امان الدین اوتگن کون کیچیقرون هلاک بولگن. بیر هفته دن بیری او ولایتده شاهین اون تورت نامی آستیده اوتکزیله یاتگن حربی عملیاتده باشقه آلتی نفر طالب حیاتینی یوقاتگن. ملی اردو، ملی پولیس و چیگره پولیس کوچلری اشتراکیده یولگه قویلگن بو عملیاتدن مقصد، طالبان فعالیت قیله دیگن مطنقه لرنی اولرنینگ تصرفیدن تازه لش بولگن. شاهین 209 قول اردوسی مسووللری نینگ معلوم قیلیشیچه، بو عملیاتده عادی اهالیگه تلفات ییتمه گن. عین حالده، بوگون قوراللی طالبان جوزحان نینگ آقچه تومنیده گی محلی پولیس پوسته سیگه هجوم قیلیب، پولیس بیلن توقنشگن. جوزجان امنیه قوماندانی فقیرمحمد جوزجانی نینگ بی بی سی ایتیشیچه، بو حادثه ده بیش قوراللی طالب هلاک بولگن. اونگه کوره، محلگه باشقه قوشیمچه کوچ اطراف تومنلردن جونه تیلگن.

بو حادثه بوگون توشدن کیین آقچه بازاریده یوز بیرگن. ایتیلیشیچه، قوراللی طالبان بازارده گی سینما یولی آرقه لی شهرگه کیریب، پوسته گه هجوم قیلیشگن. بو حادثه پولیس و عادی اهالیگه تلفات ییتمه گن. باشقه خبرگه قره گنده، اون کون دن بیری سرپل ولایتی ده عملگه آشیریله یاتگن حربی عملیات ده قوراللی طالبان نفرلریدن بیشته سی هلاک بولیب، باشقه بیش ته سی قولگه آلینگن. سرپل ولایتی حاکمی جبارحقبین نینگ ایتیشیچه، بو عملیات ولایت نینگ کوهستانات تومنیده یولگه قویلیب، اوندن مقصد، تومن نی طالبان تصرفیدن تازه لش بولگن. سونگی پیتلر مملکت ایریم حدودلریده نابرقرارلیکلر اوج آلگنی ایتیله دی. طالبان جنگریلری کیینگی وقتلرده دولت گه قرشی اوز هجوملرینی شدتلنتیریب، خوفسیزلیک وضعیت نی برهم اورماقده.