اولوسی جرگه: ینگی کابینه کیله سی هفته باشیده تنیشتیریلسین

افغانستان اولوسی جرگه سی اوزی نینگ بوگونگی ییغینیده ینگی کابینه تنیشتیریلمه گنینی بحث گه آلیب کیله سی هفته نینگ بیرینچی کونیده ینگی کابینه تنیشتیریلمه گن تقدیرده، اینگ سونگی قرارآلیشی بیلن آگاه لنتیردی.

عین حالده، ایریم ملت وکیللری کابینه کیچیکتیریلگنی مملکت نینگ امنیتی و اقتصادی وضعتیگه هم منفی تاثیر قالدیرگنینی تاکیدله دیلر.

جمهور رییسلیک سرایی سوزچیسی نظیف الله سالارزی ینگی کابینه جمهور ریسی وعده سیگه ماس اعلان ایتیلشینی معلوم قیلدی.

ملی بیردملیک حکومتی تشکیل ایتیلیشیدن قریب اوچ آی اوترایکن، ینگی کابینه تنیشتیریلمه گنی، ینه ده بوگون اولوسی جرگه ییغینده محاکمه ایتیلیب، قیزیق بحث لرگه سبب بولدی.ایریم ملت وکیللری کابینه کچیکتیریلگنی مملکت اقتصادی وامنیتی وضعیتیگه سلبی تاثیر قالدیرگنینی تاکیدلب، ملی بیردملیک حکومت نی قتیق قاره لب چیقدی. شونده ی فکر بیلن چیققن ملت وکیللریدن بیری:"افغانستان مظلوم ملتی شرق دن غربگه، جنوب دن شمالگه قدر محاصره ده نیگه بولر بونده ی قیله دیلر. جهموررییس حکومت گه ایشگه باشله شی بیلن قرق بیش کونگه قدر کابینه اعلان ایتلیش وعده سینی بیرگن ایدی.اگر مملکت وضعیتی سبب بولگن بولسه جمهوررییس وضعیت نی قندی تحلیل قیله آلمه گن. کابینه کیچکتیریلیشی گه اساسی عامل ایککی تیم اره سیده قدرت بولینیشی دیر.حکومت بیرگن وعده لریدن هیچ بیرینی عملی قیله آلمه دی شو لحاظدن مشروعیتی یوق.

بحث لرجریانیده، جمهور رییس بیلن اوچره شیب کابینه کیچیکتیریلگنی مسله سینی اورته گه قوییش و یا ملی بیردملیک حکومتیگه ینه بیرهفته مهلت بیریش مساله سی تکلیف ایتیلدی. کوپگینه جنللردن سونگ افغاستان اولوسی جرگه رییسی عبدالرووف ابراهیمی نهایی قرارنی شونده ی اعلان ایتدی:"کابینه کیچیکتیریلیشی و جاری وضعیت باره سیده قیزیق بحث لر بولدی بو تاثیر سیز ایمس، بو هفته ینگی کابینه اوچون اینگ سونگ هفته دیر، حکومت کیله جک هفته باشله نیشیده رای اوچون کابینه اولوسی جرگه گه تانشتیریلسین اگر بوندی بولمسه بیز ینگی قراری میزنی آله میز."

افغانستان جمهور رییسلیک سرایی سوزچیسی نظیف الله سالرزی بی بی سی بیلن بولگن صحبتیده، جمهور رییس وعده سی اساسیده ینگی کابینه اعلان ایتلیشیگه امید بیلدیردی:"ینگی کابینه مردم گه خذمت قیلیش اوچون جمهوررییس تامانیدن تعین ایتیلگن زمانده ته نشتیریله دی. کابینه تشکیلی خصوصیده الغه سینجیش لر هم بولگن."

اما جمهور رییس سوزچیسی کابینه انیق قچان اعلان ایتیلیشی و جمهور رییس نینگ کابینه باره سیده بیرگن وعده سی قچان عملی بولیشی باره سیده هم هیچ نرسه دیمه گن.

بیراق، افغانستان جمهور رییسی محمد اشرف غنی بولیب اوتگن لندن انجمنی عرفه سیده ینگی کابینه ایککی و یا تورت هفته جریانیده اعلان ایتیلیشیدن سوزبیرگندی. جناب غنی نینگ بو بیاناتی دن قریب اوچ هفته اوتماقده. اما کابینه دن هلی گچه درک یوق.