كيله سي ميلادي ييلده امريكا طالبان ني تعقيب ايتيشدن قول تارتيشي ممكن

طالبان گروهي رهبري ملا محمد عمر، 2001 ييل نينگ اكتوبر آييدن بيري امريكا تمانيدن تعقيب ايتيله ياتگن شخصلرنينگ رويخطيگه آلينگن و او مملكت اونينگ قولگه آلينيشيگه، 10 ميليون دالر مكافات تعيينله گن.

امريكا دولتي نينگ ايتيشيچه، ميلادي كيله سي ييل جون آيي نينگ ايككينچي كونيدن، فقطگينه امريكا نينگ خوفسيزليگي ني توغريدن توغري تهديدگه ساله ديگن طالبان گروهي اعضالريني تعقيب ايتيشي ممكن.

عين حالده، امريكا مدافعه وزيرليگي سوزچيسي جان كربي نينگ سونگي ده بير خبري ييغينده اظهار ايتيشيچه، امريكا فقطگينه طالبان گروهي بير اعضاسي گه قرشي عمليات اوتكزيشگه حركت قيله آلمه يدي.

او شونينگ ديك، امريكا اوزي افغان شيريكلريگه قرشي اوروش ني دوام ايتديره ديگن طالبان گروهي اعضالريگه قرشي عمليات اوتكزيشي ممكنليگي ني ايتگن.

امريكا مدافعه وزيرليگي سوزچيسي گه كوره، ايككينچي جون آييدن سونگ، افغانستان دولتي و خوفسيزليك كوچلري ملاعمر كبي شخصلرني تعقيب ايتيشلري ممكن.

بو تآريخ خارجي كوچلرنينگ افغانستانده گي حربي ماموريتلري توگه ليشي و اونينگ اورنيده افغان كوچلريني تيارگرليكدن اوتكزيش دن عبارت.

سونگي هفته آخرلريده فاش ايتووچي ويكي ليكس سايتي امريكا مركزي اخبارات تشكيلاتي گه ته نيب گزارش نشر ايتدي، اونده طالبان رهبري ني اولديريش باره سيده بير آز تدبير كوريب چيقيلگني تيكشيريلگن.