اولوسی جرگه اداری هیاتی کابینه خصوصیده جمهوررییس بیلن اوچرشماقچی

افغانستان اولوسی جرگه سی کابینه کیچیکیتیریلیشی خصوصیده گی اعتراض لر اوچون جمهوررییس بیلن اوچره شیشگه قرار آلدی. اما اوچره شیش انیق قچان بولیب اوتیشی حاضرگه قدرهم معلوم ایمس.

بوندن آلدین اولوسی جرگه بیرهفته جریانیده ینگی کابینه تانشتیریلیشینی حکومت دن طلب قیلگن ایدی، اولوسی جرگه نینگ بو مهلتی بوگون یکون تاپدی.

ینگی کابنیه تهنیتیریلیشی اوچون اولوسی جرگه نینگ جمهوررییس گه بیرگن بیرهفته لیک مهلتی یکون تاپیشی بیلن، ملت وکیللری کابینه کیچیتیریلیشی بحثینی بوکونگی جلسه آجنداسیگه کیریتدیلر.

جمهوررییس محمد اشرف غنی ایکی ویا تورت هفته ده ینگی کابینه تهنیشتیریلیشینی سوزبیرگن ایدی. کیله جک کون مهلت نهایه سی،اما اولوسی جرگه وکیللری پارلمان کیچیکتیریلیشی مملکت وضعیتیگه منفی تاثیر قالدیرگنینی تیلگه آلدیلر.

شوندی جنجاللر یوزه گه چیقیشی بیلن ایریم ملت وکیللری کابینه نینگ مهم وزیرلیک لریگه سیاسی حزبلرگه باغلیق بولمه گن شخصلر تانشتیریلیشی کیرک لیگینی تاکیدله دیلر، اما ایریم ملت وکیللری بو تکلیف گه قرشی چیقیب مهم وزیرلیک لر سیاسی بولیشی حتمی ایکن لیگینی تاکیدله دیلر.

نهایت اولوسی جرگه اعضالری کابینه کیچیکتیریلیش مساله سینی توغریدن توغری جمهوررییس بیلن اورته گه قوییلیشی کیرک لیگینی ایتدیلر. اما اولوسی جرگه رییسی عبدالروف ابراهیمی انیق بو اوچره شوو قچان بولیب اوتیشی حقیده هیچ نرسه ایتمی تفصیلاتی جلسه ده گزارش بیریلیشینی تاکیدله دی:"اداری هیات اون سککیز کمیسیون رییسلری بیلن بیرگه جمهورریس نی کورسینلر، اوندن کیین جمهورییس پیامی اساسیده قراریمیزنی آله میز."

حاضرگه قدرهم جمهوررییسلیک سرای بوخصوصده هیچ قندی مناسبت بیلدیرمه گن، اما بوندن الدین ارک ده گی منبع لردن بیری بی بی سی گه کابینه تنشتیریلیشی خصوصیده قرشیلیک لرهلی هم موجودلیگینی ایتگن ایدی. همده بو منبع حکومت بیرگن وعده سیگه ماس کابینه نی تنیشتیریش اوچون شدت بیلن ایش الیب باره یاتگنینی تاکیدله دی.