تخار ولایتی نینگ 7 اولسواللیگیگه تاجیکستان دن برق اوتکزیلیشی ممکن

تخار ولایتی نینگ ولایت حاکمی سوزچیسی سنت الله تیمور نینگ ایتیشیچه اوشبو ولایت یتتی تومنی گه تاجیکستان دن برق قوه سینی اوتکزیش اوچون دستلبکی سروی ایشلری عملگه آشگن و بو لایحه اوچون 21 میلیون دالر صرف له نیشی نظرده توتیلگن.

بولایحه نی عملی قیلیش اوچون تاجیکیستان نینگ ختلان و افغانستان نینگ تخار ولایت لری حاکملری اره سیده کیلیشوو بیتمی بوندن الدین امضالنگن.

نیچه کون آلدین تخار ولایتیدن بیرگروه هیات بو لایحه قچان عملی بولیشی اوچون تاجیکیستان گه سفر قیلگن ایکن. ختلان محلی رسمیلری بو لایحه عملی بولیشی اوچون هیچ قندی قینچلیک یوق لیگیگه ایشانچ بیلدیرگن.

تخار ولایتی نینگ ولایت حاکمی سوزچیسی سنت الله تیمور ایککینچی سروی ایشی کیله جک اون بیش کونگه قدر نهایه تاپیشینی تاکیدله لب بوحقده شوندی دیدی :" 16 میگاوات برق اوتکزیش بیتمی امضالنگن، سروی ایشلری مرکزگه تقدیم ایتیله دی، آغا خان نادولت تشکیلاتی بودجه تاپیش اوچون سعی قیلماقده، هزینه قولگه کیرتیلیشی بیلن عملی ایش باشله نیب اون سککیز ای جریانیده یکون تاپه دی. برق اوتکزیش ریجه سی عملی بولیشی سابق جمهوررییس کرزی تامانیدن امضالنگن ایدی."

حاضرگه قدرهم لایحه نینگ مالی خرجتی کیم تمانیدن توله نیشی معلوم ایمس اما تخار ولایت نینگ محلی رسمیلری نادولت تشکیلات لر تامانیدن بو لایحه مالیه لنیشیگه امیدبیلدیره دی.

بولایحه عملی بولگن حالده، تخار ولایت نینگ دشت قلعه، خواجه غار، خواجه بهاوالدین، روستاق، ینگی قلعه وچاه آب تومنلری برق بیلن تامین لنه دی. روستان تومنیدن تشقری باشقه التی تومن قوشنی تاجیکیستان بیلن چیگره داش بولگن.

بوندن آلدین تخار ولایت مرکزی تاجیکیستان دن ییتیکیزیلگن برق قوه سی بیلن تامین لنگن ایدی.

بیراق ایریم ایش بیلرمان کیشیلر بو لایحه خرجتی قیسی منبع دن توله نیشی معلوم بولمه گنی اوچون ریجه لنگن زمانیده عملی بولیشی ناممکن لیگینی ایتماقده.